Пирĕн ача-пăча тĕслĕх библиотекинче вулакансем валли мĕнпур услови тунă. Кунта тĕрлĕ тĕспе кăтартакан телевизор, видеоплеер, компьютер, 100 тĕрлĕ ытла компакт-диск, видеофильмсем, энциклопедисемпе çĕнĕ кĕнекесем, интереслĕ ача-пăча журналĕсем пур. Вулакансен йышĕ те çулленех ỹссе пырать. Уйрăмах манăн чи активлисене, кĕнекесемпе тирпейлĕ усă куракансене палăртас килет. Вĕсем- Снежана, Витя тата Женя Шленкинсем, Павлик Зайцев, Рома Савельев, Максим Чукмарев, Артем Васильев, Саша Самуков, Стасик Григорьев. Сережа Чернов, Катя Данилова, Алина Антонова, Юля Самукова, Катя Боровкова, Оля Ефремова та кĕнеке вулама çав тери юратаççĕ. Пирĕн библиотекăра интереслĕ нумай информаци илме, мультфильмсем курма, килĕшекен кĕнекесемпе журналсем вулама пулать. Елена Прокопьевăпа Лилия Мингалиева библиотекарьсем пурне те ăшшăн кĕтсе илеççĕ, ачасен ыйтăвĕсем çине тулли хуравсем пама тăрăшаççĕ. Эпир, ача-пăча библиотекинче ĕçлекенсем, массăллă мероприятисем ирттересси çине уйрăмах пысăк тимлĕх уйăратпăр. Вĕсене интереслĕ йĕркелеме тăрăшатпăр. Пĕчĕкреххисем валли вăйăсем те йĕркелетпĕр. Сăмахран, нумаях пулмасть пĕрремĕшсемпе "Кĕнеке патшалăхне - Ăслăлăх çĕрне çулçỹреве кайни" уяв ирттертĕмĕр. Вĕсене ачасем вулакансен ретне тăнине халалларăмăр. Вĕренекенсене фойере 2 клоун кĕтсе илчĕ. Пĕрремĕшсемпе пĕрле кĕнеке, библиотека çинчен тупмалли юмахсен тупсăмĕсене тупрĕç, "Юмахри геройсене пĕлĕр" викторина ирттерчĕç. Библиотекăра пĕрремĕшсене Буратино, Мальвина, Хĕрлĕ калпак (Красная шапочка), Айболит тухтăр кĕтсе илчĕç. Вĕсем пурте хăйсем пурăнакан кĕнекесем çинчен калаçрĕç, вĕсене вулама сĕнчĕç. Айболит тухтăр кĕнекесемпе мĕнле усă курмалли çинчен каласа пачĕ, ача-пăча библиотеки пирки астумалăх çырнине парнелерĕ. Çак кун "Волшебник по имени книга" выставка йĕркелерĕмĕр. Ачасем пурте библиотекăран кĕнекесем илчĕç. Уяв вĕçленес умĕн "Кĕнекене пухăн" вăйă вылярăмăр. Пурне те юмахсенчи геройсене ỹкернĕ ỹкерчĕксем валеçсе патăмăр. Музыка çеммипе ачасен çак кĕнекесене шыраса тупмалла. Вăйă шавлă та чылайлăха асра юлмалла иртрĕ. Пирĕн художник Людмила Шорникова мероприятисем хитре иртчĕр тесе нумай тăрăшать. Вăл юмахри персонажсен костюмĕсене ăсталать, ỹкерет... Ачасем, эпир сире яланах кĕтетпĕр. Сирĕнсĕр, сирĕн ыйтăвăрсемсĕр пирĕн ĕç те интереслĕ пулаймĕ.

Первоисточник: "Каçал Ен"