Республикăри волейбол турнирĕн финалти ăмăртăвĕсене декабрĕн 25-мĕшĕнче Вăрмар районĕнче ирттерме палăртнă. Çак кунсенче районсен спортсменĕсем зонăсенче мала тухассишĕн волейбол площадкисенче тупăшрĕç. Декабрĕн 11-мĕшĕнче Комсомольски 2-мĕш вăтам шкулĕн спортзалне ултă район волейболисчĕсем килсе çитрĕç. Кунта Канаш, Патăрьел, Шăмăршă, Елчĕк, Тăвай(пĕлтĕрхи турнирта республикăра иккĕмĕш вырăн йышăннă), Комсомольски спортсменĕсем тупăшрĕç. Командăсем икĕ ушкăна пайланса вылярĕç. Пĕрремĕш ушкăнра Тăвай, Патăрьел, Комсомольски волейболисчĕсем площадкăна тухрĕç. Пĕрремĕш вăйăра комсомольскисем тăвайсене 2:0 шутпа (23:25, 25:27) выляса ячĕç. Унтан патăрьелсене 2:1, елчĕксене 2:0 шутпа парăнтарчĕç. Пирĕн волейболистсем зонăри ăмăртусенче пĕрремĕш вырăн йышăнса финала тухрĕç. Кунта Динар Фасхутдиновăн, Ильнар Гайнутдиновăн, Валерий Дмитриевăн, Олег Кондратьевăн, Вячеславпа Александр Гладковсен, Александр Ивановăн пултарулăхне палăртса хăвармаллах. Вăйăсем пуçланиччен спортсменсене Комсомольски тата Канаш районĕсен администрацийĕсен пуçлăхĕсем Г.Ф.Волковпа С.В.Антонов саламларĕç. Çак кунах Комсомольски 1-мĕш вăтам шкулĕнче районта пĕрремĕш хут армреслинг тата кире пуканĕ йăтассипе ăмăртусем иртрĕç. Унта алă вăйĕ виçес спортпа тата йывăр атлетикăпа туслă спортсменсем чылайăн хутшăннă.

Первоисточник: "Каçал Ен"