"Рассвет" ялхуçалăх кооперативĕ çулран-çул производствăри кăтартусене лайăхлатса пырать. Мĕншĕнни те паллă - тăрăшуллă, хастар, пуçаруллă ĕçченсем вăй хураççĕ ку хуçалăхра. Механизаторсем те, выльăх-чĕрлĕх патĕнче ĕçлекенсем те, уй-хирте тăрăшакансем те шанса панă ĕçе тулли кăмăлпа, пысăк пахалăхпа пурнăçлаççĕ. Кунта вара ĕçе йĕркелеме пĕлни пысăк вырăн йышăнать. Çакă хуçалăх руководителĕнчен Михаил Романович Афанасьевран нумай килет. Илер-ха ĕне фермине. Декабрĕн 1-мĕшĕ тĕлне дояркăсем фермипе вăтамран кашни ĕнерен 5482-шер килограмм сĕт суса илнĕ. Ку кăтарту, пĕлтĕрхи çак вăхăтрипе танлаштарсан, 294 килограмм пысăкрах (иртнĕ çул 5188 килограмм пулнă). Усă куракан кашни 100 гектар çĕр пуçне 550 центнер сĕт туса илнĕ, пĕлтĕрхинчен 29 центнер нумайрах. Уйрăмах Ольга Наумова, Валентина Павлова, Альбина Чернова кăтартуллă ĕçлеççĕ. Вĕсен тăрăшулăхĕ ĕне-выльăх шутне те ỹстерсе пыма май парать. Енчен те пĕлтĕрхи декабрĕн 1-мĕшĕ тĕлне "Рассветра" мăйракаллă шултра выльăх 288 пуç пулнă пулсан, кăçал вĕсен йышĕ 303 пуçа çитнĕ. Ĕнесенчен пăру илесси те пĕлтĕрхинчен чылай ỹснĕ. Иртнĕ çулхи кăтарту - 76 пуç, кăçалхи- 97 пуç. Хуçалăхра халăхран сĕт пуçтарасси те аван пулса пырать. Çак вăхăт тĕлне ял çыннисенчен 210 тонна сĕт сутăн илсе заводсене ăсатнă е пĕлтĕрхинчен 32 тонна нумайрах. "Ĕнен сĕчĕ- чĕлхи çинче",- тени çав тери тĕрĕс. Çакна "Рассветра" лайăх ăнланаççĕ, тĕпе хурса ĕçлеççĕ. Акă, кунта кăçал кашни условнăй выльăх пуçне 32-шер центнер апат единици тивет. Унсăр пуçне, кооператив хăй комбикорм хатĕрлет, унта кирлĕ таран тутлăхлă япаласем хушаççĕ. Ĕнесене хĕвелçаврăнăш жмыхĕпе те тăрантараççĕ. Çакăн пек тĕллевлĕ ĕçлени Тукайри ĕне ферминче ырми-канми вăй хуракансене Çĕнĕ çула пысăк парнепе -кашни ĕнерен 6000-шер килограмм сĕт суса илнипе кĕтсе илме май парать.

Первоисточник: "Каçал Ен"