Районти ĕçпе юрă, спорт уявĕсенче Рашит Хамбиков кĕрешỹ кавирĕ çине тухса темиçе хутчен те çĕнтерỹçĕ пулса пысăк приз- така- çĕнсе илнине спорта юратакансем лайăх пĕлеççĕ. Чăннипех спортпа туслă вăл. Хăйĕн пултарулăхĕпе савăнтарать Рашит. Акă, нумаях пулмасть çак спортсмен Тутар Республикинчи Алметьевск хулинче иртнĕ кĕрешỹçĕсен(вырăсла ăна "борьба на поясах" теççĕ) Раççей турнирĕнче пулчĕ. Кавир çине Рашит 90 килограмм таранхи виçеллисемпе тухрĕ. Кашни тытăçура судьясем вăл çĕнтерỹçĕ пулнине çирĕплетсе пычĕç. Пирĕн спортсмен финалти тытăçусене хутшăнма ирĕк çĕнсе илчĕ. Çав тери çивĕч иртрĕ Владимир Зуйковпа иккĕшĕн хушшинчи кĕрешỹ. Балпа шутласа судьясем Комсомольски районĕн спортсменĕ иккĕмĕш вырăна юлнине палăртрĕç. Раççей шайĕнче иккĕмĕш вырăн йышăнни Рашит Хамбиковшăн лайăх кăтарту. Паян вăл Тутарстанра иртекен ытти ăмăртусене хутшăнма хатĕрленет.

Первоисточник: "Каçал Ен"