Нумаях пулмасть Комсомольскинчи хырлăха кăнтăр енчи 4 районти 100 ытла медработник пуçтарăнчĕ. Район тата ял администрацийĕсен представителĕсем те, предприятисемпе организацисен ертỹçисем те пулчĕç унта. Ăмăрту "Лыжня России-2005" девизпа çĕнтерỹ 60 çул çитнине халалласа иртрĕ. Йĕлтĕрпе чупса ăмăртасси медицина ĕçченĕсемшĕн йăлана кĕнĕ ĕнтĕ. Кашни çулах Комсомольски, Елчĕк, Патăрьел, Шăмăршă районĕсенчи медицина ĕçченĕсем пĕрле пуçтарăнса тупăшу ирттереççĕ. Ăмăртăва килнисене район администрацийĕн пуçлăхĕн çумĕ Н.А.Максимов саламларĕ, йĕлтĕр йĕрĕ çинче ăнăçу сунчĕ. Малтанах йĕлтĕрçĕсем комбинациллĕ эстафетăра тупăшрĕç. Кунта пирĕн районти тĕп больницăн туслă команди №Р.Тимергалеев, Н.Волкова, В.Краснов, Э.Замкова, Е.Павлова, А.Самаркин№ çĕнтерчĕ. Патăрьелсемпе шăмăршăсем _ иккĕмĕшпе виççĕмĕш вырăнсенче. "Атте, анне, эпĕ _ спорт çемйи" номинацире ыттисене чылай кая хăварса пирĕн больницăра ĕçлекен Волковсем №иккĕшĕ те васкавлă пулăшу уйрăмĕнче ĕçлеççĕ№ тата вĕсен ывăлĕ Святослав пĕрремĕш вырăн йышăнчĕç. Патăрьелĕнчи Афанасьевсен çемйи иккĕмĕш, Елчĕкри Уруковсем виççĕмĕш вырăнсене тивĕçрĕç. Уйрăм йĕлтĕрçĕсем те çĕнтерỹшĕн хĕрỹ тупăшрĕç. Елчĕкри С.Соколова чи ла-йăх вăхăт кăтартса пĕрремĕш, Патăрьел больницин представителĕ иккĕмĕш вырăн çĕнсе илчĕç. Хамăр районти В.Жуковăн 3-мĕш кăтарту пулчĕ. Арçынсем хушшинчи ăмăрту кăтартăвĕсем тăрăх çĕнтерỹ пьедесталне пурне те комсомольскисем çĕнсе илчĕç. Р.Тимергалеев пĕрремĕш, Н.Волков иккĕмĕш, А.Самаркин виççĕмĕш вырăнсене йышăнчĕç. Командăсем хушшинче те пирĕн район больницин команди чи мала тухрĕ. Тĕп врачсем те старт илчĕç. Финиша та вĕсем пĕрлех, пĕр вăхăтра çитрĕç. Çанталăк сивĕ тăчĕ пулин те, çакă медицина ĕçченĕсене шиклентермерĕ. Ăмăрту савăнăçлă иртрĕ. Çĕнтерỹçĕсем хаклă парнесене тивĕçрĕç. Çакăн пек çитес ăмăрту Елчĕкре иртĕ.

Первоисточник: "Каçал Ен"