Президентпа тĕл пулнă Çак кунсенче республикăн тĕп хулинче КВН вăй-йăн фестивалĕ иртнĕ. Тукай Мишер вăтам шкулĕн "Девушки в черном" команди те хутшăннă. Çав кунах ЧР Президенчĕ Н.В.Федоров Президент стипендиачĕсемпе тĕл пулнă. Вăл шутра пирĕн районти Эльмира Джаудатовна Зинетуллина та пулнă. Вăл Тукай Мишер вăтам шкулĕн-че вожатăйра ĕçлет. Президент вĕсене чăнахах та стипендиат пулнине ĕнентерекен лицензисем панă. Çĕнтернĕ Çак кунсенче Комсомольски иккĕмĕш вăтам шкулне Ярославльти Телекоммуникациллĕ технологи центрĕнчен савăнăçлă хыпар çитнĕ. 11-мĕш класра вĕренекен Женя Петров Раççей шайĕнче пиллĕкмĕш хут иртекен "Çамрăк журналистсен олимпиади" конкурса хутшăнса тăваттăмĕш вырăн йышăнни, дипломант ята тивĕçни çинчен пĕлтернĕ. Унăн "Манăн ача чухнехи юратнă вырăн" ĕçне сайдсен конкурсĕнче пăхса тухнă. Çак кунсенче вĕренекен ячĕпе почта урлă ятарлă диплом тата хаклă парне килнĕ. Диплома РФ Вĕрентỹ тата наука министерстви çумĕнчи çамрăксемпе ĕçлекен федераллă агентство пуçлăхĕ С.В.Баринов алă пуснă. Çак ятпа Женя Петрова чун-чĕререн саламлатпăр, вĕренỹре ỹсĕмсем сунатпăр.

 Тĕл пересси Хальхи вăхăтра районта массăллă оборона тата спорт мероприятийĕсен уйăхлăхĕ пырать. Çавна май тĕрлĕрен мероприятисем пулаççĕ. Акă, иртнĕ канмалли кун Кĕçĕн Каçал тĕп шкулĕнче пĕчĕк калибрлă винтовкăран тĕл перессипе ăмăртусем иртнĕ. Кунта Вăрманхĕрри Чурачăк, Хирти Сĕнтĕр, Александровка тĕп тата Комсомольски иккĕмĕш, Хырхĕрри, Тăманлă Выçли вăтам шкулĕсен командисем малти вырăнсене йышăннă. Командăсем хушшинче çĕнĕкипеçсем _ пĕрремĕш, тăманлăвыçлисем _ иккĕмĕш, хырхĕррисем виççĕмĕш вырăнсене тивĕçнĕ. Тĕл перессипе Вăрманхĕрри Чурачăк тĕп шкулĕнче вĕренекен Гриша Коновалов, Тăманлă Выçли вăтам шкулĕнчи Саша Прокопьев чи пултаруллисем пулнă. 

 ОЛИМПИАДĂРА ÇĔНТЕРЧĔÇ Нумаях пулмасть районти шкулсенче вĕренекенсем экологи тата технологи предмечĕсемпе олимпиадăсенче тупăшрĕç. 10-мĕш классем хушшинче Тăманлă Выçли вăтам шкулĕнчи Оля Логинова, 11-мĕшĕнчен Шурутри Ира Платонова пĕрремĕш вырăнсене тухрĕç. Технологипе 10-мĕшсенчен Комсомольски иккĕмĕш вăтам шкулĕнчи Костя Перьев, Хирти мăнтăрти Наташа Петрова, 9-мĕшсенчен Асанкассинчи Сергей Иванов, Хирти Явăшри Роза Григорьева чи пултаруллисем пулчĕç.