Çак кунсенче "Кызыл сабанча" фермер хуçалăхĕнче отчетлă пуху пулса иртрĕ. Малтанах хуçалăх ертỹçи М.Г.Шарафутдинов отчет туса пачĕ. Районти ытти ялхуçалăх кооперативĕсемпе танлаштарсан, кунта 2004 çула начар мар кăтартусемпе вĕçленĕ. Хуçалăх кашни гектартан 18,5 центнер тĕштырă, 150 центнер çĕрулми, 400 тонна сахăр кăшманĕ туса илнĕ. Çавăн пекех пахчаçимĕç те чылай сутнă. Хуçалăхăн 300 гектар çĕр шутланать. Пĕлтĕр кунта 4 миллион та 401 пин тенкĕлĕх продукци сутнă, 1 миллион та 573 пин тенкĕлĕх таса тупăш илнĕ. Çавăн пекех хуçалăх ертỹçи малашнехи задачăсем çинче те чарăнса тăчĕ. Пахчаçимĕç, çĕрулми, пĕрчĕллĕ культурăсен тухăçлăхне ỹстермелли пирки каларĕ. Тĕп бухгалтер З.М.Бедертдинова, тĕп агроном М.З.Арифуллин сăмах илчĕç. Экономикăпа çыхăннă ыйтусем çинче чарăнса тăчĕç. Сахăр кăшманĕн лаптăкне ỹстермелли, унта гербицидсемпе ытларах ĕçлемелли пирки каларĕç. М.М.Гибатдинов бригадир çуллахи вăхăтра уй-хирте ĕçлекенсем сахалли çинчен сăмахларĕ. "Çавна май чылай ĕçе механизацилесен аванрах",- терĕ. Ферма заведующийĕ Г.М.Шарафутдинов выльăх-чĕрлĕх отраслĕ çинче чарăнса тăчĕ. Ревкомисси председателĕ Г.Ш.Феткуллина тĕрĕслев пĕтĕмлетĕвĕсемпе паллаштарчĕ. Пуху ĕçне районти ялхуçалăх управленийĕн начальникĕн çумĕ, тĕп агрономĕ И.Х. Минетуллин хутшăнчĕ, сăмах тухса каларĕ.

Первоисточник: "Каçал Ен"