Чĕчкен ял администрацийĕ пуçарнипе йĕркеленĕ волейбол турнирĕ Чĕчкен пĕтĕмĕшле пĕлỹ паракан тĕп шкулĕн спортзалĕнче кăçал тăваттăмĕш хут иртрĕ. Куракансем йышлăн пуçтарăнчĕç кунта. Спорт уявне ăшă сăмахсем каласа ял администрацийĕн пуçлăхĕ Р.Р.Абулханов уçрĕ, çак турнира Аслă Çĕнтерỹ 60 çул тултарнине халалланине пĕлтерчĕ. Аслă Чурачăк ял старости В.Т.Акчурин та сăмах илчĕ. Вăл çамрăксене спортпа туслă, сывлăхлă пулса, ял администрацийĕ йĕркеленĕ волейбол турнирĕнче çĕнтерме ăнăçу сунчĕ. Çак ăмăртăва волейболистсен пилĕк команди хутшăнчĕ. Вĕсем _ "Труд" кооперативăн, ялти ветерансен, студентсен, Аслă Чурачăкпа Чĕчкен шкулĕсен командисем. Волейбол площадкинче хĕрỹ тытăçусем пуçланчĕç. Уйрăмах "Труд" кооперативпа студентсен командисем хушшинчи вăйă çивĕч иртрĕ. Студентсем ăстарах вылянине кăтартса пачĕç, пĕрремĕш вырăн йышăнчĕç, ял администрацийĕн парнине çĕнсе илчĕç. "Труд" кооператив спортсменĕсем _ иккĕмĕш, Чĕчкен пĕтĕмĕшле пĕлỹ паракан тĕп шкулĕн волейболисчĕсем виççĕмĕш вырăнсене тивĕçрĕç. "Чи пултаруллă волейболист" ята Чăваш патшалăх университечĕн студенчĕ Дмитрий Мальчиков çĕнсе илчĕ. Спортсменсем валли вĕри апат та хатĕрленĕ. Турнир çỹллĕ шайра ирттĕр тесе ял администрацийĕ, "Труд" кооператив правленийĕ, Х.Идиатуллинпа Р.Юнусов предпринимательсем нумай тăрăшрĕç.

Первоисточник: "Каçал Ен"