Хирти Явăш вăтам шкулĕнче вĕренекенсем тата вĕрентекенсем кăçалхи хăйсен пысăк тата пĕчĕк ĕçĕсене Аслă Çĕнтерĕвĕн 60 çулне халаллаççĕ. Çĕршывăн пулас хỹтĕлевçисен уйăхлăхĕ те çĕнтерỹ ячĕпех иртрĕ. Мини-футбол ăмăртăвĕсем ирттересси кунта тахçанах йăлана кĕнĕ. Акă, нумаях пулмасть шкулти спортплощадкăна 4 команда пуçтарăнчĕ: Хирти Явăш çамрăкĕсем, Тутар Эльпуç каччисем, "Дружба" ЯХПК правленийĕн членĕсем тата шкул ачисем. Ăмăртăва кооператив ертỹçи Р.М.Мансуров сăмах каласа уçрĕ. Тĕлпулу хиртиявăшсемпе правлени командисем вылянипе пуçланчĕ. Вăйăра правленисем 2:1 шутпа çĕнтерчĕç. Эльпуçсемпе шкул ачисем те 2:1 шутпа вылярĕç. Ăмăрту хыççăн Ремис Мансурович пĕтĕмлетỹ турĕ. Пĕрремĕш вырăна Эльпуç ачисем çĕнсе илчĕç. Иккĕмĕшсем шкул ачисем пулчĕç. Виççĕмĕш вырăна правлени команди тухрĕ. Çĕнтерỹçĕсене хаклă парнесем парса чысларĕç. Ăмăрту спонсорĕ Р.М.Мансуров хăй пулчĕ. Каçхине çамрăксем Эльпуç культура çуртне пухăнчĕç. Хамăр шкултан вĕренсе тухнă, Чечен вăрçинче пуçне хунă Рамил Гафуров ячĕпе çулсерен волейбол ăмăртăвĕсем иртеççĕ кунта. Тĕлпулăва культура çурчĕн директорĕ Самат Сейфуллов уçрĕ. Хĕрỹ кĕрешỹре М.Кобец ертсе пыракан ушкăн (Тутар Эльпуç çамрăкĕсем) çĕнтерме пултарчĕ. Иккĕмĕш вырăна Рестем Фаряхов команди тухрĕ. "Спартак" ушкăн (капитанĕ С.Сейфуллов) виççĕмĕш пулчĕ. Çĕнтерỹçĕсем ятарлă парнесене тивĕçрĕç. Çар уйăхлăхĕнче шкулта ăмăртусем татах та иртрĕç. Вĕсене шкулти физкультура учителĕ А.К.Давыдов йĕркелесе пычĕ. Аслă классем хушшинче ирттернĕ биатлон ăмăртăвне 14 çамрăк хутшăнчĕ. Икĕ рубежри(тăрса тата выртса перессипе) очкосене хушсан пĕрремĕш вырăна В.Давыдов, А.Зарипов иккĕмĕш, Р.Халитов виççĕмĕш вырăнсене çĕнсе илчĕç. Дартс вăййинче 67 шкул ачи хушшинче С.Павлов, А.Розов, В.Давыдов çĕнтерчĕç. Классем хушшинче вуннăмăшсем 161 очко, вунпĕрмĕшсем 157 очко, тăххăрмĕшсем 125 очко пухма пултарчĕç. М.Халитов, С.Алексеев, В.Легостин армреслинг енĕпе ăмăртса çĕнтерỹçĕсен ятне тивĕçрĕç. Ăмăртăва пурĕ 84 ача хутшăнчĕ. Арçын ачасем 24 килограмлă кире пуканĕ йăтассипе ăмăртрĕç. Вунпĕрмĕш класра вĕренекен А.Зарипов палăрчĕ. Вăл кире пуканне 180 хут çĕклеме пултарчĕ. Шкул коллективĕ "Çĕнтерĕвĕн 60 çулне 60 ырă ĕç" акцие ырласа йышăнчĕ. "ПЯСОШ" организаци канашĕ ырă ĕçсен ятарă планне турĕ. Ачасем ĕçсене уйрăм таблица-стенд çине палăртса пыраççĕ. Аслă Çĕнтерỹ тĕлне кашни класс вунă пĕчĕк ĕç тусан та ырă ĕçсен шучĕ 60 кăна мар, çĕртен те иртет. Пиллĕкмĕшсемпе çиччĕмĕш классем вăрçă ветеранĕсене, пĕччен пурăнакан ватăсене пулăшма шутларĕç. Л.Хайруллина, Р.Ильин, Т.Павлова, Л.Мифтахова ертсе пыракан тимур ушкăнĕсем ватăсене юр хырса, шыв йăтса, урай çуса, вут купаласа пулăшаççĕ. Апатне те пĕçерме пĕлеççĕ тимуровецсем, пỹрт-çурта тирпей-илем кỹме те пултараççĕ. Шкулта 7 тимур команди йĕркелерĕç. Пилĕк ялта 7 вăрçă ветеранĕ пурăнать, пĕччен пурăнакан ватăсем 50 яхăн. Тимуровецсен ĕç нумай. Ачасем хайлавсем çыраççĕ, конкурссене хатĕрленеççĕ, тĕлпулусем ирттереççĕ. .

Первоисточник: "Каçал Ен"