Ман шутпа, çыннăн телейĕ çынна ырă тунинче. Эпĕ хама ырă тунă çынсене яланах пулăшма, чĕрери ăшă сăмахсене вĕсене парнелеме тăрăшатăп. Акă, Хĕрарăмсен кунĕ çывхарнă май Вера Трифоновна Осиповăна аса илтĕм. Эпĕ ăна 1963 çултанпах пĕлетĕп. Ун чухне вăл Аслă Чурачăк вăтам шкулне çỹретчĕ. Тăрăшуллă, сăпайлă вĕренекенччĕ. Кайран пирĕн çулсем уйрăлса кайрĕç. Çамрăксем хуланалла çул тытрĕç, эпĕ çемье çавăрнă хыççăн Хирти Явăшра пурăнма тытăнтăм, шкулта ĕçлерĕм. 1970 çулта мăшăрăн тăван ялне, Тури Тимĕрчкассине куçса килтĕмĕр. Çав çулах Вера Трифоновнăпа тĕл пултăм, хĕрарăмсен советĕнче ĕçлеме пуçларăмăр. Унăн кăмăлĕ яланах уçă, çын çинчен нихăçан та усал каламасть. Çавăнпах хисеплеççĕ ăна ялта. Анат Тимĕрчкассинчи почта уйрăмĕн начальникĕнче 30 çул ĕçлерĕ. Ватă çынсене вăхăтра пулăшса пычĕ, кашнин валли ырă сăмах тупрĕ. Мĕн кирлĕ тата тивĕçлĕ канăва тухнă çынна! Юрлама, ташлама та ăста вăл. Мăшăрĕ, Аркадий Арсентьевич, вырăнти администраци пуçлăхĕ пулнăччĕ. Çавăн чухне яланах вĕсем иккĕшĕ те Культура çурчĕн сцени çинчеччĕ, хăйсен юррисемпе çынсене савăнтаратчĕç. Халĕ Вера Трифоновна тивĕçлĕ канура, унăн ĕçне юратнă кинĕ малалла тăсать. Лариса Анатольевна Çĕнĕ Мăрат ялĕнче çуралса ỹснĕ, аслă пĕлỹллĕ специалист. Хунямăшĕ пекех пултаруллă, çынсемпе çепĕç. Мăшăрĕ, Вера Трифоновнăн виççĕмĕш ывăлĕ, Чăваш патшалăх педагогика университечĕн физкультура факультетне пĕтернĕ хыççăн Çĕнĕ Мăрат вăтам шкулĕнче физкультура учителĕнче ĕçлерĕ. Çавăн чухне паллашрĕç те. Халĕ вĕсен хĕрачи Яна ỹсет. Килĕштерсе, юратса пурăнаççĕ Осиповсем. Аркадий Арсентьевич иртен пуçласа каçчен ĕçре: вăл _ "Луч" ЯХПК председателĕн заместителĕ, агроном. Килти ĕçсем, паллах, Вера Трифоновнăн аллинче. Мăшăрĕпе ачисем килнĕ çĕре яланах сĕтел çинче вĕри апат, хĕрарăмăн пичĕ çинче ăшă кулă. Осиповсен аслă ывăлĕ, Саша, ашшĕсемпе юнашарах пурăнать. Унăн хăйĕн çемйи. Мăшăрĕпе иккĕшĕ икĕ хĕр çитĕнтереççĕ. Ывăлĕпе кинĕ ĕçе кайсан ачисене Вера Трифоновна пăхать, мăнукĕсене питĕ юратать. Хĕрĕ, Люба, вĕренỹ отличникĕ, малтан Чăваш патшалăх педагогика университетне пĕтерчĕ, пуçламăш классен учительници пулса тăчĕ. Халĕ юриста вĕренет, Çĕнĕ Шупашкар хулинче милицире ĕçлет. Кĕçĕн ывăлĕ, Володя, Чăваш патшалăх ялхуçалăх академийĕнче вĕренет. Уявсенче çемье пĕрле пухăнать, праçник сĕтелĕ хушшинче чылайччен лараççĕ, аса илмеллисем те чылай вĕсен. Март уйăхĕнче Осиповсем хăйсен ахах туйне палăртаççĕ. Паллах, кил ăшшине, чунтан юратнă мăшăрне Аркадий Арсентьевич вăл кун шăрçа парнелетех (йăли çавăн пек). Вера Трофимовнăна уяв кунĕ ячĕпе чун-чĕререн саламлатăп, ырлăх-сывлăх сунатăп. .

Первоисточник: "Каçал Ен"