Мартăн 11-мĕшĕнче администраци ларусем ирттермелли пысăк залĕнче район депутачĕсен Пухăвĕн черетлĕ ларăвĕ иртрĕ. Унăн ĕçне район самоуправленийĕн пуçлăхĕ Г.Ф.Волков ертсе йĕркелесе пычĕ. Депутатсем кун йĕркинче чылай ыйту пăхса тухрĕç. Районăн 2004 çулхи социаллă, экономикăлла аталанăвĕ, бюджет пурнăçланăвне тишкерчĕç. Вырăнти самоуправлени тытăмĕн çĕнĕлĕхĕсене кура район уставне улшăнусем кĕртме тиврĕ. Депутатсем муниципалитет пурлăхне приватизацилессипе район программине те улшăнусем кĕртес ыйтăва пăхса тухрĕç. Çавăн пекех депутатсем Тутар Эльпуç ялĕнче пурăнакансен тавăçне тивĕçтерме килĕшрĕç. Çак ялти Овражная урам малашне Чечен республикинче паттăрла пуç хунă Р.Гафуров ячĕпе хисепленсе тăрĕ. Депутатсем кун йĕркинчи кашни ыйтăва тĕплĕн сỹтсе яврĕç, тивĕçлĕ йышăну кăларчĕç. .

Первоисточник: "Каçал Ен"