"Çăварни çуни çапла, ай, пулать-и? Пар ут кỹлмесен, ай, каять-и?" илтĕнет аякран çăварни юрри. Çĕнĕ Кипеçри ферма хĕрĕсем иккен, ут кỹлсе, юрă шăрантарса Çăварни уявне илем кỹрсе килеççĕ. Çапла пуçланчĕ Пĕтĕм тĕнчери хĕр-арăмсен кунĕпе пĕр килнĕ Çăварни праçникĕ. Ăмăр çанталăка пăхмасăрах палăртнă уява ирттерме Çĕнĕ Кипеçпе Тĕвенеш ялĕсенче пурăнакансем ял варрине пуçтарăнчĕç. Уява юрă-ташă илем кỹчĕ. Ферма ĕçченĕсем, культура çурчĕ çумĕнчи художествăлла пултарулăх членĕсем, шкул ачисем хăйсен пултарулăхĕпе савăнтарчĕç ял халăхне. Спорт мероприятийĕсем те пулчĕç. Çав хушăрах вĕрен те туртрĕç. Кире пуканĕ йăтса вара И.Андреев çĕнтерчĕ. Çăварни уявне ирттерме "Изамбаево" ялхуçалăх кооперативĕ укçан парса пулăшрĕ (ертỹçи В.Г.Портнов). Йĕлтĕрпе чупассипе ирттернĕ ăмăртăва хутшăннă йĕлтĕрçĕсене хавхалантарма Тĕвенеш ялĕнчи Н.И.Васильев фермер 500 тенкĕ спонсорла пулăшу пачĕ. Николай Иванович хăй те мĕн ачаран йĕлтĕр спортне юратса ỹснĕ. Çулĕсем çамрăках мар пулин те, районта, республикăра иртекен ăмăртусене хутшăнать. Нумаях пулмасть Шупашкарта иртнĕ "Лыжня России" ăмăртуран таврăнчĕ. Утмăла çывхарса пыракансем хушшинче финиша 6-мĕш çитнипе кăмăллă вăл. Николай Иванович йĕлтĕр спортне аталантарассишĕн тăрăшать, çамрăксене те çак ĕçе явăçтарасшăн, сывă пурнăç йĕркипе пурăнма чĕнсе калать. Шкул ачисем хушшинче йĕлтĕрпе чупса малти вырăнсене А.Николаевпа С.Воронков, П.Смирнов, В.Журавлев, Ю.Исаев йышăнчĕç. Хĕрарăмсенчен чи пуçарулли, чи маттурри Е.Козлова пулчĕ. Н.Васильев, Ю.Козлов, В.Васильев, А.Андреев, Д.Можаев, В.Журавлев командисем хушшинчи хĕрỹ тапхăр вара пурне те тыткăнларĕ. Уяв йăлана кĕнĕ пăр çинчи мини-футболпа вĕçленчĕ.

Первоисточник: "Каçал Ен"