Иртнĕ эрнере районти культура çуртĕнче Асанкасси культура çурчĕн директорĕн, хăй тĕллĕн вĕреннĕ композиторăн И.В.Портновăн юбилей каçĕ иртрĕ. Унта халăх йышлăн пухăнчĕ. Иван Владимирович мĕнпурĕ 30 яхăн юрă çырнă. Унăн пĕрремĕш юрри - "Çăлкуç". Вăл 1980 çултанпа янăрать, ăна халĕ республикăри тĕрлĕ юрăçсемпе ансамбльсен репертуарĕнче курма пулать. Юбилей концертĕнче ăна Асанкассинчи культура çурчĕ çумĕнчи художествăлла пултарулăх коллективĕн илемлĕх ертỹçи Елена Маштанова тата Иван Портнов хĕрỹллĕн шăрантарчĕç. Иван Владимирович хăй кĕвĕленĕ чылай юрă юрларĕ. Курса ларакансем "Кунсерен", "Пуçана", "Пĕр-пĕрне телей сунар", "Пирĕн кỹршĕсем" тата ытти юрăсене те ăшшăн йышăнчĕç. Солист сцена çинче хăйне килти пек ирĕклĕн тытрĕ. Юрăсене ташласа, тĕрлĕ хусканусем туса илем кĕртрĕ. Унăн уçă та чун-чĕрене хускатакан хăйнеевĕрлĕ сасси кашнинех тыткăнларĕ. Залри халăх ăна тăвăллăн алă çупса тав турĕ. Хăй тĕллĕн вĕреннĕ композиторăн юррисене Асанкассинчи хĕрарăмсен, районти культура çурчĕ çумĕнчи "Кубняночка" ансамбльсем, Елена Маштанова, Бронислав Карзаков солистсем илемлĕн шăрантарчĕç. Композитор тăван ял илемне те юрăсенче сăнланă- "Асанкасси", "Асанкасси гимнĕ", "Савнă ял, Асанкасси". Сăмах май каласан, гимн сăввине И.В.Портновăн Шупашкарта пурăнакан йăмăкĕ Нина Киреева çырнă. Иван Владимирович ачасем валли те юрăсем çырать. Уншăн эстрада жанрĕ те ют мар. Çакна Асанкасси вăтам шкулĕнче вĕренекен Диана Карпова тата Марина Бахтерова солистсем яр-уççăн кăтартрĕç. Культура çурчĕн директорĕ ялта балалайкăпа калакансен ансамбльне йĕркеленĕ. Кунта ачасем те, çитĕн-нисем те хаваспах çỹреççĕ. Концерт куракансем вĕсен пултарулăхĕпе те интересленсех паллашрĕç. Юбиляра Асанкаси ял администрацийĕн пуçлăхĕ Н.И.Филиппов, культура работникĕсен профсоюз райкомĕн председателĕ М.В.Мокеева, районти культура çуртĕнчи илемлĕх ертỹçи Альбина Кокшина тата ыттисем те саламларĕç, парнесемпе чĕрĕ чечексем пачĕç. Пирĕн районта çакăн пек пултаруллă та талантлă юрăç тата композитор пурри савăнтарать. Ăна малашне татах та илемлĕрех юрăсем кĕвĕлеме вăй-хал сунас килет. Çакна та каламалла, районта хăйсем пурăннă чухнех ырă ят çĕнсе илнĕ творчество çыннисем халиччен те пулнă. Шел пулин те, вĕсем 55 çула çитичченех çĕре кĕнĕ. Сăлтавĕсем тĕрлĕрен. Çавăнпа та малашне Комсомольски çĕрĕ çинче çуралса ỹснĕ пултаруллă та хастар çынсен, хăй тĕллĕн вĕреннĕ композиторсемпе юрăçсен, сăвăçсен юбилей каçĕсене те кунтах ирттересчĕ, вĕсем вёрём .м.рл. пултёрчч.=?

Первоисточник: "Каçал Ен"