Чĕчкен пĕтĕмĕшле пĕлỹ паракан тĕп шкулĕнче 124 вĕренекен пĕлỹ илет. Вĕсенчен 12-шĕ - отличник, 41-шĕ- ударник. Ачасене тарăн пĕлỹ парас тесе 17 вĕрентекен вăй хурать. 3 учитель 1-мĕш категориллĕ. Вĕсен ĕçне ачасем районти олимпиадăсенче лайăх кăтартусемпе палăрни те çирĕплетет. Акă, И.Гимаев тутар чĕлхипе тата литературипе республикăри олимпиадăра та палăрнă. Ачасем спортпа та туслă. "Зарница" çарпа спорт вăй-йинче вĕренекенсем 2-мĕш вырăн йышăнчĕç. Шкулта волейбол, шашка-шахмат тата ытти спорт вăййисен секцийĕсем те ĕçлеççĕ. Çак спорт енĕсемпех ачасем районти ăмăртусенче малти вырăнсене йышăнаççĕ. Шкулăн 4 гектар çĕр пур. Иртнĕ çул унта урпа акса тунă. Ăна пуçтарса кĕртме "Труд" кооператив правленийĕ пулăшнă. Шкул çумĕнчи лаптăк çинче пахчаçимĕç çитĕнтернĕ. Вĕсемпе ачасене вĕри апат çитернĕ çĕрте усă куратпăр. Туса илнĕ продукцие сутатпăр. Укçа-тенкĕпе шкула автомашинăна юсама, спорт площадкине йĕркене кĕртме усă курнă. Куллен тытмалăх та укçа-тенкĕ кирлĕ. Чĕчкен шкулĕн коллективĕ ачасене пĕлỹ тата воспитани парас тесе çине тăрса ĕçлет. 

Первоисточник: "Каçал Ен"