Хырхĕрри вăтам шкулĕнче спортпа çыхăнтарса тĕрлĕ конкурссем, ăмăртусем, уяв каçĕсем ирттересси йăлана кĕнĕ. Кăçал вара Çĕршыв хỹтĕлевçисен уявне тĕлпулупа çыхăнтарас тесе палăртрĕç. Вăрманхĕрри Чурачăк тĕп шкулĕн коллективĕ анлă та пуян программа хатĕрленĕ. Хырхĕррисене ăшшăн кĕтсе илнĕ хыççăнах хĕрỹ ĕçе пуçăнчĕç. Вăййа хутшăнакансем вара çанă тавăрсах тăрăшрĕç: "пулă тытасси" те, "хăмпă çурасси" те питех те кăткăс пулчĕç. Пăшалтан пеме, теннисла выляма пĕртте çăмăл пулмарĕ. Шавларĕ, кĕрлерĕ шкулăн спортзалĕ. Ача-пăча тĕнчине лекнĕнех туйăнчĕ педагогсене. Йăл кулă чылайă-шĕн питĕнче çуталчĕ. Чунпа эпир, чăнах та, питĕ çамрăк иккен. Вениамин Васильевич Белков физрук _ çак мероприятин тĕп режиссерĕ. Уяв каçĕ, паллах, юрă-ташăсăр илемсĕр. Раиса Тихоновна Морозова учитель хăйĕн шăпчăк сассипе, купăсçă ăсталăхĕпе тĕлĕнтерчĕ, савăнтарчĕ. Юрă хыççăн юрă шăранчĕ уяв кĕрекинче. Елена Ивановна Сапарова повар, Ирина Семеновна Ятманова, Галина Николаевна Белкова техслужащисем те питĕ пултаруллă ĕçченсем пулни курăнчĕ. Тулли кăмăлпа сывпуллашрăмăр кỹршĕ ялти ĕçтешĕмĕр-семпе. Уява йĕркеленишĕн шкул директорне Г.Н.Родионовăна, профком председательне Ф.В.Кополухинана тав сăмахĕсем калас килет. Кун пек туслă тĕлпулусем, уяв каçĕсем, спорт ăмăртăвĕсем, ĕçлĕ хутшăнусем пурнăçра питех те кирлĕ. Пĕр-пĕринпе килĕштерсе пурăннине мĕн çитĕ?

Первоисточник: "Каçал Ен"