Районта тăрăшуллă та пултаруллă библиотекарьсем сахал мар. Вĕсенчен пĕри вăл- Зинаида Николаевна Григорьева. Пурнăç çулĕ кашни çыннăн тĕрлĕрен. Пĕри ăна çуралса ỹснĕ çĕртех ирттерет, тепри - тăван килтен аякра. Хырай Ĕнел хĕрĕ Зина Родионова Çĕрпỹри культурăпа çутĕç училищин библиотека уйрăмне хĕрлĕ дипломпа пĕтернĕ хыççăн Йăлмахва ялĕнчи библиотекăра вăй хума пуçлать. Виталий Григорьевпа çемье çавăрса, малашнехи пурнăçне çак ялпа çыхăнтарать. Библиотекарь патне чылай çын тĕрлĕ ыйтупа пырать. Кĕнеке хуçин вара артист та, учитель те, психолог та пулмалла. Пурин валли те хурав тупмалла, кашнин ыйтăвне тивĕçтермелле. З.Н.Григорьева шаннă çĕрте тивĕçлипе тăрăшать. Зинаида Николаевна 37 çул пĕр улшăнмасăр Йăлмахвари библиотекăра ĕçлет Вăл "Чи лайăх библиотекарь", "Професси тĕлĕшĕнчен чи лайăххи" ятсене тăтăшах çĕнсе илнĕ. Раççей, республика, район шайĕсенчи Хисеп грамотисем илме тивĕç пулнă. 2004 çулхи пĕтĕмлетỹсем тăрăх Йăлмахва библиотеки "Районти чи лайăх библиотека" ята çĕнсе илчĕ. Зинаида Николаевна мăшăрĕпе Виталий Кирилловичпа виçĕ ача çуратса ỹстернĕ. Вĕсене тивĕçлĕ воспитани тата пĕлỹ панă. Паллах, мăнукĕсене çитĕнтерме хунямăшĕ те нумай пулăшнă. Ялта ача сачĕ çук. Çавăнпа пĕчĕкскерсем кунĕпех Лидия Никитичнăпа пулнă. Сăмах май каласан, халĕ кинеми 91 çулта. Ăна кинĕпе ывăлĕ лайăх пăхаççĕ, аякра пурăнакан мăнукĕсем те кашни килмессерен çывăх çыннине ăшă сăмахсемпе, парнесемпе савăнтараççĕ. Григорьевсен хĕрĕсемпе ывăлĕ аслă тата вăтам пĕлỹ паракан вĕренỹ заведенийĕсем пĕтернĕ. Тĕрлĕ çĕрте ĕçлеççĕ- Ирина Шупашкарта, Владик Тольяттире, Люда Мускавра пурăнаççĕ. Пуш уйăхĕн 27-мĕшĕнче Зинаида Николаевна Григорьева хăйĕн юбилейне паллă турĕ. Çак ятпа ăна районти библиотекарьсем, культура пайĕ, Кайнлăк ял администрацийĕ чĕререн саламларĕç. Çирĕп сывлăх, тулли телей, ĕçре çитĕнỹсем сунчĕç.

Первоисточник: "Каçал Ен"