Граждансен пухăвĕ Кĕçĕн Каçал ялĕнче те иртрĕ. Комсомольски ял администраци пуçлăхĕ П.В.Лапшин отчетлă доклад туса пачĕ. Иртнĕ çул кĕçĕнкаçалсемшĕн паллă çул пулса юлчĕ. Яла çутçанталăк газĕ кĕртсе пĕтерчĕç. Уйрăм темиçе кил çеç юлнă. Район больницин тĕп врачĕ М.И. Федорова та пирĕн ял çыннисемпе тĕл пулма килнĕ. Вăл граждансен ыйтăвĕсем çине тĕплĕн хуравларĕ. Пенси фончĕн управляющийĕ З.В.Каринкина пенсионерсене çĕнĕ законсемпе паллаштарчĕ. "Красный маяк" ялхуçалăх кооперативĕн председателĕ В.Г.Апраков хуçалăхри ĕçсем çинчен каласа пачĕ. Пирĕн ял пĕчĕк мар. Çамрăксем те нумай. Анчах та вĕсем валли ĕç çителĕксĕр. Нумай чухне ĕç хушсан та итлемеççĕ. Тухса калаçакансенчен чылайăшĕ Кĕтне шывĕ пирки сăмах хускатрĕ. Пĕвесем, армансем пĕтнипе Кĕтне те типсе пырать. Ун хĕррине тасамарлăх кăларса пăрахаççĕ. Ял урамĕсенче те тирпейлĕх çук. Ăпăр-тапăра урама кăларса пăрахаççĕ, ял илемне пĕтереççĕ. Кашни çулах пухусенче çакăн пирки калаçатпăр. Анчах лавĕ вырăнтах. Çỹп-çапа ятарлă вырăна тăкасси йăлана кĕреймест. Çакă çынсене хумхантарать. Район администрацийĕн пуçлăхĕ Г.Ф.Волков Аслă вăрçă участникĕсене юбилей медалĕ пачĕ. Ялти ветерансене ырлăх-сывлăх сунчĕ. Ялта 5 ветеран çеç юлнă ĕнтĕ. Вĕсем вăрçă вутĕнче пулнисем. А.С. Ижеев, В.С.Кокорев, Н.И. Ширшов, Н.Ф.Гоголев, А.С.Ишеев юбилей медальне тивĕçрĕç. Ĕç ветеранĕсем, вăрçă вăхăтĕнче ĕçленисем вара 35 çын. Вĕсем те медаль илчĕç. Вĕсенчен нумайăшĕ 80-90 çула çитнĕ. Сыввисем пурте пухăва килчĕç. Медаль илнĕ хыççăн вĕсен пичĕ çинче савăнăç кулли вылярĕ. Пуху хыççăн ялти художествăлла пултарулăх коллективĕ концерт лартса пачĕ. 

Первоисточник: "Каçал Ен"