Çурхи хĕвел ăшăрах та ăшăрах кунсем илсе килме пуçларĕ. Хирсем юртан тасалчĕç. Часах вĕсенче автомашина-трактор сасси кĕрлеме пуçлĕ. Çак тапхăрта йăлана кĕнĕ йĕркепе районти водительсен пĕрлехи пухăвĕ иртет. Ăна шалти ĕçсен пайĕн ГИБДД уйрăмĕ район администрацийĕпе тата ялхуçалăх управленийĕпе пĕрле йĕркелет. Кăçал çак пуху апрелĕн 15-мĕшĕнче районти культура çуртĕнче иртрĕ. Пуху ĕçне предприятисемпе организацисен, колхозсемпе кооперативсен механикĕсене, руководителĕсене чĕннĕ. Çавăн пекех çак мероприятие хутшăнма автотранспорт тытакан уйрăм çынсене те, предпринимательсене те йыхравланă. Мĕншĕн тесен пухура çул-йĕр хăрушсăрлăхне çирĕп-летес енĕпе тăракан паянхи çивĕч ыйтусем тĕп вырăн йышăнни палăрчĕ. Водительсен пĕрлехи канашлăвне районти шалти ĕçсен пайĕн обществăлла хăрушсăрлăх милицийĕн начальникĕ А.Н.Ларионов уçрĕ. Вăл хăйĕн сăмахĕнче кĕскен районти криминаллă лару-тăрупа паллаштарчĕ. ГИБДД уйрăмĕн начальникĕ А.А.Салицев çул-йĕр хăрушлăхне чакарас ыйтусем Раççей, республика, район шайĕсенче мĕнле пулнине çутатса пачĕ. А.А.Салицевăн докладне пĕтĕмлетсе çул çинчи хăрушсăрлăх инспекцийĕн начальникĕ М.Н.Алексеев, Росгосстрах специалисчĕ В.А.Громов, налук инспекцийĕн специалисчĕ Г.К.Зейнетдинов, çул-йĕр участокĕн начальникĕ М.М.Гинатуллин, район прокурорĕ В.А.Гришин тата ыттисем те тухса калаçрĕç. Пухăва хутшăннă водительсене район администрацийĕн пуçлăхĕ Г.Ф.Волков хăйĕн сăмахĕнче кулленхи ĕçре ăнăçу, телей сунчĕ. Ĕре палăрнă водительсем çак кун хаклă парнесене тивĕçрĕç. 

Первоисточник: "Каçал Ен"