Выльăх-чĕрлĕх отраслĕ кăçалхи пĕрремĕш кварталта мĕнле ĕçлесе пынине пĕтĕмлетес тата малашнехи тĕллевсем палăртас тесе нумаях пулмасть районти ялхуçалăх кооперативĕсемпе колхозсенчи фермăсенче ĕçлекен специалистсен канашлăвĕ пулса иртнĕ. Ăна ялхуçалăх управленийĕн начальникĕ Г.М.Киргизов уçнă. Ялхуçалăх управленийĕн тĕп зоотехникĕ К.Г.Гимальдинов хуçалăхсенчи выльăх-чĕрлĕхĕн хĕллехи тапхăрти продуктивлăхĕ тата пĕрремĕш квартал пĕтĕмлетĕвĕсем пирки чарăнса тăчĕ, выльăхсене çуллахи тапхăра куçарас ыйту çине тимлĕх уйăрчĕ. Выльăхсен чирĕсем, вĕсене хирĕç кĕрешес ыйтусемпе районти ветстанци начальникĕ Р.М.Велимухаметов сăмах илчĕ. Мăйракаллă шултра выльăх тата сыснасен ăратлăхне лайăхлатас, çамрăк выльăх илес ыйтусемпе ăратлăх енĕпе районта ĕçлекен зоотехник Н.И.Емельянов тухса калаçрĕ. Тĕрлĕ ыйтусемпе "Луч", "Восток", "Труд" ялхуçалăх кооперативĕсенчи И.И.Ананьев, Е.Н.Степанова, А.И.Гордеев хăйсен шухăшĕсене палăртрĕç. Канашлу ĕçне район администрацийĕн пуçлăхĕ Г.Ф.Волков пĕтĕмлетрĕ.

Первоисточник: "Каçал Ен"