Районти пĕрлешỹллĕ хуçалăхсенче техника тĕрĕслевĕ малалла пырать. Çак кунсенче "Слава", "Труд" тата "Луч" ялхуçалăх кооперативĕсем хыççăн "Асаново", "Рассвет", "Заря", "Искра", "Победа", "Дружба" хуçалăхсенчи техника та тĕрĕслев урлă иртрĕ. Пĕтĕмĕшле илсен, асăннă хуçалăхсенчи механизаторсем хăйсене шанса панă тракторсемпе прицепсене япăх мар хатĕрленине палăртмалла. Çапах та вăл е ку техникăна тĕрĕсленĕ чухне механизатортан хăйĕнчен çеç килекен кăлтăксем пур. Гайкăсене хытарассине, электрооборудование йĕркене кĕртессине тата тупса палăртнă ытти çитмен-лĕхсене техосмотр тухнă чухне çеç асăрхани тракториста пĕрре те чыс кỹмест! Кăçал çуракине хутшăнакан механизаторсенчен чылайăшĕ кивĕ удостоверенисемпех. Вĕсене комисси кая юлмасăр çĕннипе улăштарма хушса хăварчĕ. Трактора чĕртсе янă чухне вăл хускалса каясран асăрханмалли блокировка пулманнипе инкек сиксе тухнă тĕслĕхсем республикăра кашни çулах пулаççĕ. Эпир те тăтăшах кун пирки асăрхаттарса тăратпăр. Çакăн усси пурах. Çỹлерех асăннă хуçалăхсенчи техникăна тĕрĕсленĕ чухне блокировка ĕçлемен тĕслĕхсем пĕрре те асăрхамарăмăр. Тракторсене тата прицепсене сăрланă хыççăн вĕсем çĕнĕ сăн кĕреççĕ. Куншăн та ырламалла. Прицепсен тормозĕ ĕçлеменни ĕç вăхăтĕнче инкек кăларса тăратма пултарать. Шел пулин те, "Дружба", "Победа" ялхуçалăх кооперативĕсенче тормоз ĕçлемен прицепсем палăрчĕç. Уйрăммăн илсен яланхи пекех "Асаново", "Рассвет", "Заря", "Искра" хуçалăхсем техосмотра лайăх хатĕрленнĕ. "Победа" ялхуçалăх кооперативĕнчи механизаторсен кăçал ытти çулсенчипе танлаштарсан хавхалану пурри курăнчĕ. Вĕсем мĕн май килнĕ таран техникăна çурхи ака-суха ĕçĕсене хатĕрленĕ. Хăшпĕр хуçалăхсенче механизатор кадрĕсем çитменни палăрать. "Дружба" ялхуçалăх кооперативĕнче вара çуракинче ĕçлеме 1 гусеницăллă трактор пуçне 4 тракториста ĕçе илнĕ. Вĕсенчен дисциплина енчен çирĕп ыйтаççĕ. Акари хĕрỹ вăхăтра ĕç йĕркине пăсмалла мар. Техосмотр вăхăтĕнче "Асаново" ялхуçалăх кооперативĕн-чи И.Р.Ильин, В.П.Катмаков, В.Н.Миронов, Э.Н.Карпов, А.В. Калашников, А.Н.Языков, А.А. Прокопьев, "Рассвет" хуçалăхри В.Н.Афанасьев, В.А.Портнов, "Искра" хуçалăхри Н.В.Воробьев, С.М.Мартынов тата ытти хăшпĕр механизаторсем палăрчĕç. Вăхăт иртет. Районти ытти хуçалăхсен те тракторсене техника тĕрĕслевне хатĕрленипе пĕрлех кăкарса ĕçлемелли агрегатсене те юсаса хумалла.

Первоисточник: "Каçал Ен"