Çанталăк ирех ăмăр тăчĕ пулин те, Комсомольски вăрманĕ хĕррине апрелĕн 24-мĕшĕнче спорта юратакан виççĕр ытла çын пуçтарăнчĕ. Çак кун çуллахи спорт сезонĕ уçăлчĕ. Ăна Аслă Çĕнтерĕвĕн 60 çулхи юбилейне халалланă. Чи малтанах 1 километрлă дистанцие район тата ял администрацийĕсенче ĕçлекенсем тухрĕç, вĕсем çуллахи сезона уçрĕç. Дистанцире чи асли 82 çулхи спорт ветеранĕ С.И.Зубарев пулчĕ. Район администрацийĕн вĕрентỹ управленийĕн ĕçченĕсем сывлăх кунне чи йышлăн хутшăнчĕç. Ытти пайсенче ĕçлекенсене вара çумăрлă çанталăк хăратнă пулас. Шкулсенче вĕренекенсем хушшинчи ăмăрту питĕ çивĕч иртрĕ. Тĕп шкулсенчи хĕр-ачасем 500 метра, арçын ачасем 1 километра, вăтам шкулсенчи хĕрсем 1 километра, каччăсем 2 километра чупрĕç. Хырхĕрри, Тăманлă Выçли, Кĕçĕн Çĕрпỹел вăтам, Александровка тĕп шкулĕсен спортсменĕсем лайăх кăтартусемпе палăрчĕç. Чарăнми çумăр çурĕ пулин те, шкул ачисем хăйсен дистанцийĕсене чăтăмлăн чупса тухрĕç. Ăшăнмалăх вĕри чей ĕçтернĕ пулсан питĕ лайăхчĕ те, анчах ăмăртăва йĕркелекенсем çакна темшĕн шута илмен. Ял администрацийĕсенчен килнĕ уйрăм спортсменсем те 500 метрлă тата 1 километрлă дистанцисенче вăй виçрĕç. Хĕрарăмсем хушшинче М.Костякова(Александровка), Н.Яковлева (Шурут) тата Т.Фуражкина (Эльпуç) чи маттуррисем пулчĕç. Арçынсенчен вара А.Александров (Александровка) финиша чи малтан çитрĕ. Анатолийпе Владимир Давыдовсем (иккĕшĕ те Эльпуç ял администрацийĕнчен) те лайăх вăхăт кăтартрĕç. Çуллахи спорт сезонĕ тĕрлĕ мероприятисемпе пуян пулĕ. Спортсменсене пысăк çитĕнỹсем тума ăнăçу, çирĕп сывлăх сунатпăр. 

Первоисточник: "Каçал Ен"