Чăваш Эльпуçĕ - пысăках мар ял. Кунта тăрăшуллă та хастар, пултаруллă çынсем пурăнаççĕ, кашнийĕ яла илемлĕрех тăвассишĕн вăй хурать. Акă, апрелĕн 22-мĕшĕнче чăвашэльпуçсем ир-ирех пурте пĕрле пуçтарăнчĕç. Ял администрацийĕ пуçарнипе (специалисчĕ М.А. Иванова) çак кун ял çыннисем тирпей-илем кĕртес енĕпе субботник ирттерчĕç. Яла пырса кĕрекен лапама юр айĕнчен тухнă тасамарлăхран тасатрĕç. Çỹп-çап тăкакан вырăна тирпейлерĕç. Çамрăксемпе пĕр танах ваттисем те тăрăшрĕç. Вĕсем хушшинче З.Сметанина пенсионеркăна, Л.Иванова колхозницăна палăртмалла. Шкул ачисем те яла тирпей-илем кĕртессинчен айккине пăрăнса юлмарĕç. Ашшĕ-амăшĕсемпе пĕрле уйрăмах Сашăпа Вова Легостинсем маттур ĕçлерĕç. Тăрăшрĕ ял халăхĕ. Паян тирпей-илем куçа илĕртет. Эльпуçсен тĕллевĕсем пысăк. Акă, апрелĕн 29-мĕшĕнче вĕсем ял çывăхĕнче чăрăш посадки, кĕтỹ тапăрта тăракан вырăнта йăмра хунавĕсем лартма палăртрĕç. Ял илемĕшĕн хамăрăн тăрăшмалла, пире никам та килсе тасалăхпа тирпейлĕх туса парас çук.

Первоисточник: "Каçал Ен"