"Çĕрулмие мухтав" агрофирма "иккĕмĕш çăкăрăн" лаптăкне кăçал тата ỹстересшĕн, 300 гектара çитересшĕн. Çакăн валли вĕсем пысăк пахалăхлă вăрлăх çителĕклĕ хатĕрлесе хăварнă. Агрофирмăн агрономĕ Алексей Селиванов каланă тăрăх, çĕрулми питĕ лайăх хĕл каçнă. "Труд", "Луч", "Красный маяк", "Рассвет" хуçалăхсем кунтан элита сортлă вăрлăх туянма кăмăл тунă. Ытти районсенчен те -Куславккаран, Елчĕкрен, Канашран, Çĕмĕрлерен- килнĕ паха вăрлăх илме. Часах агрофирма техники хире тухĕ. Çанталăк аван тăрсан, паян ир пулакан "импалăпа" "тима" сортсене лартма пуçласшăн. Вĕсем 15 гектар йышăнмалла. Техника тĕлĕ-шĕнчен çитменлĕх пулмĕ кунта, мĕншĕн тесен кăçал çеç икĕ трактор туяннă. Пĕри, ют çĕршывра туса кăларнă "Джон Дир", 140 лаша вăйлĕ. Вăл- универсаллă, унпа сухалама та, йăрансем тума та, груз турттарма та, урăх çĕрте усă курма та пулать. Тепри вара - МТЗ-82 "Белорус". Çак техникăпа ĕçлеме механизаторсем пур. "Çĕрулмие мухтав" агрофирма картишĕнче чылайранпа хĕрỹ ĕç вĕрет. Кунта вăрлăхсене сортлаççĕ, имçамлаççĕ, михĕсем çине тултараççĕ, хире илсе тухма хатĕрлеççĕ. Ĕçе пĕтĕмпех механизациленĕ. Çавăнпа та суйлакансем те йышлăн мар, 10-12 çын çеç. Комсомольскинчен, Виçпỹртрен ĕçе çỹреççĕ кунта. Çĕрулми- тупăшлă культура. Унран пысăк тухăç илес тесен паянах çине тăрса ĕçлемеллине ăнланаççĕ "Çĕрулмие мухтав" агрофирмăра.

Первоисточник: "Каçал Ен"