Пирĕн районта Аслă Отечественнăй вăрçăн 140 яхăн участникĕпе инваличĕ пурăнать. 1941-1945 çулсенче тылра ĕçленисем вара- пиншерĕн. Вĕсенчен пурте тенĕ пекех Аслă Çĕнтерĕвĕн 60 çулхи юбилейĕн медальне илме ĕлкĕрчĕç. Пĕлтĕр Беларуç Республикин Президенчĕ А.Лукашенко та хăйĕн Указĕпе "Беларуç Республикине нимĕç захватчикĕсенчен ирĕке кăларнăранпа 60 çул" медаль çирĕплетнĕ. Чăваш Ене вăрçă паттăрĕсене чыслама кỹршĕллĕ патшалăхран 403 медаль килсе çитнĕ. Пирĕн районта та Белоруссие ирĕке кăларма хутшăннисем пур. Паянхи кун тĕлне вĕсенчен тăххăрăшĕ ырă-сывă пурăнать. Майăн 4-мĕ-шĕнче райадминистрацин пысăк залĕнче медальсем хуçисем патне çитрĕç. Кĕçĕн Каçалти Николай Гоголева, Комсомольскинчи Василий Еремеева, Василий Краснова, Степан Шалина, Аслă Çĕрпỹелĕнчи Наталия Мельниковăна, Хирти Сĕнтĕрти Иван Салмина, Эткер ялĕнчи Александра Скворцовăна, Эльпуçĕнчи Гадельзян Фахрутдинова, Янкассинчи Василий Алексеева район пуçлăхĕпе Г.Волковпа Чăваш Республикин ял хуçалăх министрĕ М.Игнатьев медальсем çакса ячĕç, çывхарса килекен уяв ячĕпе саламларĕç. Вăрçă участникĕсен, инваличĕсен, тылра хастар ĕçленисен пурнăçне çăмăллатас, лайăхлатас тесе пирĕн патшалăх нумай тăрăшать. Вĕсен килĕсене çăмăллатнă йĕркепе телефон кĕртессине те хăйĕн тивĕçĕ тесе йышăнать. Кăçалхи апрелĕн 1-мĕшĕ тĕлне телефон кĕртес текенсен черетĕнче 13 ветеран пулнă. Кабеллĕ телефон кĕртме вăхăт чылаях кирлĕ. Çĕнтерỹ уявĕ тĕлне вара ватăсене савăнăç кỹрес килет. Çавăнпа ветерансене "Вымпел-регион" ООО "Би лайн" компанипе пĕрле сотовăй телефонсем парнелерĕç. Çак парнене чăннипех тивĕçлĕ вĕсем, пирĕн ветерансем. 

Первоисточник: "Каçал Ен"