Аслă Çĕнтерĕвĕн 60 çулхи юбилейне Çĕнĕ Мăрат ялĕнче пурăнакансем те чыслăн кĕтсе илчĕç. Çак ялтан вăрçа кайнисенчен 117-шĕ тăван килне таврăнайман. Вăрçăра пуç хунисене асăнса лартнă палăксене сăрласа илемлетнĕ, йĕри-тавра тирпейленĕ. Майăн 7-мĕшĕнче ял варринчи палăк умĕнче савăнăçлă митинг иртрĕ. Ăна Çĕнĕ Мăрат вăтам шкулĕн директорĕ К.В.Жестянкина ертсе пычĕ. Ветерансен совечĕн председателĕ С.Басников ачасене иртнĕ вăрçă çулĕсем çинчен каласа пачĕ. Пухăннисене Тукай ял администрацийĕн пуçлăхĕн çумĕ Р.Афанасьева, "Заря" ЯХПК председателĕ А.Павлов, "Каçал ен" хаçат редакторĕ Л.Голыева саламларĕç. Вăрçă ветеранĕн Н.Павловăн сăмахĕ вара çамрăксемшĕн халал вырăннех пулчĕ темелле. Николай Ильич вĕсене ырă та урă пурнăç йĕркине тытса пыма, пĕр-пĕринпе килĕштерсе пурăнма, лайăх вĕренсе çĕршывшăн усăллă çынсем пулма чĕнсе каларĕ. Палăксем ум-не веноксем хунă хыççăн çамрăк армеецсен парачĕ иртрĕ. Çĕнтерỹ салючĕ пани уява хăйне евĕрлĕ сăн кĕртрĕ. Вăрçă участникĕсемпе тылра ĕçленисем, салтак арăмĕсем валли шкул ачисем концерт та хатĕрленĕ.

Первоисточник: "Каçал Ен"