Раççей перекет банкĕн Чăваш Енри уйрăмĕ хăйĕн вкладчикĕсене хавхалантарас, тачă çыхăну йĕркелес тесе яланах тĕрлĕ акцисем ирттерет. Акă, Аслă Çĕнтерĕвĕн 60 çулхи юбилейĕ ячĕпе те республикăра çакнашкал акци иртрĕ. Укçи-тенкине перекет банкĕнче чылай çул упракан вăрçă участникĕсем, ĕç ветеранĕсем хушшинче лотерея евĕрлĕ ирттерсе кандидатсене суйласа илнĕ. Пирĕн районти ветерансенчен телейлисен шутне Комсомольскинче пурăнакан Л.Т.Титовăпа Г.В.Удин, Урмаелĕнчи М.Г.Гайнутдинов лекнĕ. Иртнĕ эрнекун вĕсене Чăваш перекет банкĕн Комсомольскинчи офисĕн управляющийĕ Е.С.Кополухина пуçтарса чысларĕ. Пурне те электроутюг парнелерĕ. Сăмах май каласан, Лидия Титова- перекет ĕçĕн ветеранĕ. Вăл кунта аслă бухгалтерта чылай çул тăрăшнă. Мингали Гайнутдинов- вăрçă участникĕ. Геннадий Удин вара хăйĕн пурнăçне вĕрентỹ ĕçĕпе çыхăнтарнă. Парни пысăк мар пулин те, чысĕ хаклă. Ветерансем хăйсене перекет банкĕ çапла сума сунăшăн çав тери хĕпĕртерĕç, Елена Сергеевнăна тав сăмахĕ каларĕç.

Первоисточник: "Каçал Ен"