Тунтикун, майăн 16-мĕшĕнче, Комсомольски вăрманĕ хĕрринче "Зарница" çарпа спорт вăййисем пуçланчĕç. Унта пĕтĕмĕшле пĕлỹ паракан шкулсен вунă команди пуçтарăннă. Çамрăк армеецсене "Зарница" уçăлнă ятпа район администрацийĕн пуçлăхĕ Г.Волков, ĕçпе вăрçă, спорт ветеранĕ С.Зубарев, çар ĕç комиссарĕ С.Кузьмин подполковник саламларĕç. Чăваш Республикин ялавне çĕклеме Александровка тĕп шкулĕн вĕренекенĕ Настя Майорова тивĕç пулчĕ. Настя- отряд командирĕ те. Сăмах май, 10 отрядран çуррийĕшĕнче командирсем- хĕрачасем. Çакă хĕрачасен яваплăхĕ пысăкраххипе çыхăннă пулинех. Çĕршыва сыхлама вара каччăсен каймалла... "Зарница" икĕ куна пырать, майăн 18-мĕшĕнче вĕсене аслăраххисем, "Орленок" вăййине хутшăнакан вăтам шкулсен командисем улăштарĕç. Ун хыççăн вуннăмĕш классенчи арçын ачасемпе çар вĕренĕ-вĕсем ирттереççĕ. Çак вĕренĕве районта юлашки вăхăтра темиçе çул ĕнтĕ ирттермен. Анчах вăхăт вĕсем питех те кирлине кăтартса пачĕ.

Первоисточник: "Каçал Ен"