Хырхĕрри вăтам шкулĕн 11-мĕш класĕнчен кăçал вунпĕр хĕрпе каччă вĕренсе тухать, 9-мĕшĕнчен - çиччĕн. Майăн 21-мĕшĕнче вĕсемшĕн юлашки шăнкăрав янăрарĕ. Выпускниксене уяв ячĕпе шкул директорĕ Ю.П.Алексеев, И.М. Степанова завуч, "Каçал ен" хаçатăн тĕп редакторĕ Л.Г.Голыева, классен руководителĕсемпе пĕрремĕш вĕрентеке-нĕсем, ашшĕ-амăшĕсем, кĕçĕннисем саламларĕç. Шкул пĕтерекенсем хăйсем, паллах, пурнăçăн анлă çулĕ çине тухнăшăн хĕпĕртеççĕ ĕнтĕ. Аслисемшĕн вара кăшт хурлăхлăрах çак кун. Ара, вĕсен ывăл-хĕрĕсен, вĕренекенĕсен тăван килтен, тăван шкултан уйрăлмалли самант çывхарса килет-çке. Паян куç тулли тăракан ачасем текех уроксене васкамĕç, коридор тăрăх шавлăн утмĕç. Вĕсене, патшалăх экзаменĕсене тытнă хыççăн, ятарлă вăтам е аслă пĕлỹ паракан вĕренỹ заведенийĕсем кĕтеççĕ. Тăван яла, кунти тусанлă та тарлă ĕçе, рабочи профессине суйласа илекенсем те пулĕç. Вунпĕрмĕшсен ертỹçине Н.Н.Ятманова класпа уйрăлма тата та йывăртарах пуль, мĕншĕн тесен ачасем пурт- пултаруллă спортсменсем. Вĕсем районти, республика шайĕнчи ăмăртусенчен тăван шкула пĕрре кăна мар çĕнтерỹпе таврăннă. Спортра çитĕнỹсем тунăшăн Николай Никандрович кашнинех Хисеп грамотисемпе чысларĕ. Выпускниксем те парăмра юлмарĕç. Хăйсене пĕлỹ панă пур учитель валли те ăшă та чĕре патĕнчен тухакан сăмахсем тупрĕç, чĕрĕ чечексем парнелерĕç. 2004-2005 вĕренỹ çулĕнче Хырхĕрри вăтам шкулĕнче 59 ача вĕренет. Вĕренекенсен йышĕ пĕчĕк пулнипе ăна çитес вĕренỹ çулĕнчен вăтам мар, тĕп шкул статусĕпе хăвараççĕ. Аслă классем вара Комсомольскине çỹреме пуçлĕç. Пурнăç çапла тума ыйтать.

Хырхĕрри вăтам шкулĕнчен кăçал вĕренсе тухакансем. Комсомольски пĕрремĕш вăтам шкулĕ умне вĕренекенсемпе вĕрентекенсем, ашшĕ-амăшĕсем, хăнасем чылайăн пухăнчĕç. Юлашки шăнкăрав уявне шкул директорĕн çумĕ Е.С.Свинина уçрĕ. А.С.Терентьев директор шкул пĕтерекенсене ăшшăн саламларĕ, экзаменсене ăнăçлă тытма сунчĕ. Кăçал 57 выпускник шкулпа сывпуллашать. Вĕсене район администрацийĕн пуçлăхĕн çумĕ, районти вĕрентỹ управленийĕн начальникĕ Н.А.Максимов, шкулăн пĕрремĕш, 1941 çулхи выпускникĕ, Аслă Отечественнăй вăрçă, ĕç тата спорт ветеранĕ С.И.Зубарев, шкулти ветерансен совечĕн председателĕ Г.А.Титов, вунпĕрмĕшсен пĕрремĕш учительници Е.Г. Длинова, класс ертỹçи Г.И. Гаврикова саламларĕç. Ашшĕ-амăшĕсен комитечĕн председателĕ В.Н.Гаврилов пурне те çирĕп сывлăх, ăнăçу сунчĕ. Çавăн пекех вунпĕрмĕшсене пĕрремĕшсем саламларĕç, парнесем пачĕç. Вĕренекенсем шкулпа сывпуллашакансене юрă-ташă парнелерĕç. 

Аслă Чурачăк вăтам шкулĕнчи юлашки шăнкăрав уявне Е.А.Еремеева учительница уçрĕ. Шкул директорĕ А.Н. Пушкина ачасене вĕренỹ çулĕ вĕçленнĕ ятпа ăшшăн саламларĕ, экзаменсене лайăх тытма ăнăçу сунчĕ. Вĕренỹре, ĕçре, спортра, юрă-ташăра палăрнисене Хисеп грамотисем пачĕ. Вĕренекенсем те юлашки шăнкăрава килнисене хаваслă юрăсем парнелерĕç. Кăçал шкул пĕтерекенсен ашшĕ-амăшĕсем М.Г.Григорьева, Е.В.Шуряшкина, Ш.Ш.Гимальдинов тав сăмахĕсем каларĕç. Юлашки шăнкăрава 11-мĕш класра вĕренекен С.Шуряшкинпа И.Александрова янăратрĕç. Кăçал шкул пĕтерекенсен умĕнче пысăк тĕллевсем: пĕрлехи патшалăх экзаменĕсене тытмалла. Ытти классен те экзаменсем пур. Кĕçĕннисене вара ăшă та ырă çуллахи каникул кунĕсем кĕтеççĕ.

Комсомольски 2-мĕш вăтам шкулĕнче юлашки шăнкăрав майăн 21-мĕшĕнче янăраса ачасене кăçалхи вĕренỹ çулĕ вĕçленнине пĕлтернĕ. Вĕренекенсене район администрацийĕн пуçлăхĕ Г.Ф.Волков саламласа экзаменсенче ăнăçу суннă. Шкул директорĕн Г.Е. Длиновăн, шкулăн попечитель канашĕн председателĕн Н.В.Антоновăн сăмахĕсенче те çав шухăшах пулнă. Пуçламăш класра вĕренекенсем, ачасен ашшĕ-амăшĕ кăçал шкул пĕтерекенсене салам сăмахĕсем каланă. Пурнăçăн анлă çулĕпе утма телей суннă. Ачасем хăйсене пĕлỹ панă учительсене тав тунă. Ĕнер вара шкул пĕтерекенсем пĕрлехи патшалăх экзаменне тытнă. Ачасем хăйсем "Обществознани" предмечĕпе илнĕ пĕлĕве тĕрĕсленĕ. 

 Кăçалхи вĕренỹ çулне районта 432 вĕренекен пĕтерет. Кашни шкултах юлашки шăнкăрав сас панă. Вĕренỹре, спортра палăрнисем парнесене, Хисеп грамотисене тивĕçнĕ.