Çурхи ака-суха ĕçĕсене пĕтерсен асатте-асаннесен мĕн авалтанах ака пăтти тăвас йăла пулнă. Акнă тырă-пулă, лартнă çимĕç ăнса пултăр, кĕркунне пысăк тухăç илес тесе тунă çакна. Ваттисен йăлине асран кăлармасть район халăхĕ, ака паттăрĕсене чысласа Акатуй ирттерет. "Дружба" ял хуçалăх кооперативĕнче çакăн пек уяв майăн 28-мĕшĕнче пулчĕ. Халăха чăннипех те праçник туса парас тесе-ши, çанталăкĕ те уяр та лăпкă тăчĕ. Уяв ячĕпе саламлама кунта район администрацийĕн пуçлăхĕ Г.Ф.Волков, пĕрремĕш заместителĕ Г.М.Киргизов килчĕç. Ир-ирех кооператив правленийĕ умĕнчи лапам сутуçăсен автомашинисен сассипе тулчĕ, ачасен юрри-ташши ял çыннисене савăнма йыхравларĕ. Малтанах "Дружба" ял хуçалăх кооперативĕн ертỹçи Р.М.Мансуров уй-хирте, выльăх-чĕрлĕх патĕнче ĕçлекенсене çураки вĕçленнĕ ятпа саламласа хастар ĕçшĕн мухтарĕ, тав турĕ. Чылай ĕçченĕн акара пурнăçланă ĕç калăпăшĕ чăннипех те пысăк. Кăçалхи çуракине "Дружба" хуçалăхра 12 кунра вĕçлерĕç. Ĕçченсем преми илме тивĕç пулчĕç. Водительсене те, выльăх-чĕрлĕх пăхакансене те манса хăварман кооператив правленийĕ. Район администрацийĕн пуçлăхĕ Г.Ф.Волков та салам сăмахĕпе тухса калаçрĕ. Юрă-ташăра çеç мар, спортра та Эльпуç ял администрацийĕнче пурăнакансем яланах хастар пулнине палăртрĕ. Спортри çитĕнỹсемшĕн хуçалăхри футбол командине Хисеп грамотипе чысларĕ. Çавăн пекех ĕçпе вăрçă ветеранĕ, чылай çул "Дружба" колхоз председателĕ пулнă С.А.Алиуллов, ĕç ветеранĕ Ш.З.Зарипов сăмах илчĕç. Юрă-ташăсăр уяв та уяв пек мар. Вырăнти художество пултарулăх коллективĕсем, уйрăм солистсем, Аслă Çĕрпỹел ял администрацийĕн культура ĕçченĕсем, Хирти Явăш вăтам шкулĕн вĕренекенĕсем сцена çине пĕрин хыççăн тепри тухрĕç. Чăваш эстрада юрăçисем те- М.Туринге, О.Прокопьева тата С.Степанов хăйсен юррисемпе савăнтарчĕç. Ĕçре çеç мар, спортра та пултаруллă кунти ялсенчи ывăл-хĕр. Михĕпе çапăçас тупăшура, кире пуканĕ йăтассипе, алă вăйне виçессипе, вĕрен туртассипе тата ытти енĕпе те пултаруллисене палăртрĕç. Акă, вĕрен туртассипе Хирти Мăратри хĕрарăмсен ушкăнне çитекенни пулмарĕ. Алă вăйĕ виçес (армреслинг) енĕпе 1-мĕш вырăна А.Ефремов (районти шалти ĕçсен пайĕ), 2-мĕш вырăна А.Мясников (Хирти Мăрат ялĕ), 3-мĕш вырăна В.Гордеев (Хирти Явăш ялĕ) тивĕçрĕç. Уява вĕçлесе волейбол турнирĕ иртрĕ. .

Первоисточник: "Каçал Ен"