Районта сĕт сăвакансен тата техник-осеменаторсен кон- курсне ирттересси йăлана кĕнĕ. Кăçалхи ăмăрту "Урожай" колхозра пулчĕ. Унта 9 хуçалăхри ферма ĕçченĕсем хутшăнчĕç. Шел пулин те, ытти хуçалăхсенчен ăмăртăва хутшăнма килмерĕç. Кашни хуçалăхрах пултаруллă ĕçченсем пур. Çулталăкра пĕрре çеç иртекен çак конкурса хутшăнма пулнах. Дояркăсем малтанах ĕне сума хатĕрленес, сăвăм пахалăхĕ пирки тупăшрĕç, каярахпа ĕне сумалли машинăна вăхăтпа сỹтсе пуçтарас ăсталăха кăтартрĕç. Дояркăсен выльăх-чĕрлĕх отраслĕпе çыхăннă теориллĕ ыйтусем çине те хуравлама тиврĕ. Техник-осеменаторсем вара хăйсен теориллĕ пĕлĕвне практикăра çирĕплетрĕç. Жюри вĕсен производствăлла кăтартăвĕсене те шута илнĕ. Районти ăмăртура сĕт сăвакансем хушшинче чылай çул дояркăра ĕçлекен Зоя Михеева ("Восток" кооператив) мала тухрĕ. Вăл чăннипех те пултаруллă ĕне сăвакан пулнине унăн ĕçри кăтартăвĕсем те çи-рĕплетеççĕ. Иккĕмĕш вырăнта - "Слава" ял хуçалăх кооперативĕн доярки Н.Сейфуллина. Виççĕмĕш вырăнта - "Луч" ял хуçалăх кооперати-вĕнчи В.Г.Николаева тата "Урожай" колхоз ĕçченĕ Т.В.Еремеева. Çак тупăшăва "Искра", "Труд", "Асаново", "Заря", "Дружба" хуçалăхсенчи ĕçченсем хутшăнчĕç. Техник-осеменаторсенчен кăçал "Восток" ял хуçалăх кооперативĕнчи Е.П.Исаева палăрчĕ. Вăл пĕрремĕш вырăн йышăнчĕ. З.В.Орлова ("Дружба") иккĕмĕш вырăн çĕнсе илчĕ. "Урожай" тата "Асаново" хуçалăхсенчи техник-осеменаторсем Т.Г.Красильниковăпа Е.П.Демьянова - виççĕмĕш вырăнта. Районта мала тухнă доярка тата техник-осеменатор машинăпа сĕт сăвакансен тата техник-осеменаторсен республикăри кăçалхи ăмăртăвне хутшăнĕç. Вăл июнĕн 16-17-мĕшĕсенче пирĕн районти "Восток" ял хуçалăх кооперативĕн территорийĕнче иртĕ. Конкурс пуçланас умĕн ăмăрту ялавне пĕлтĕрхи çĕнтерỹçĕсем Н.Сейфуллина ("Слава") тата З.Орлова ("Дружба") çĕклерĕç. "Урожай" колхозри конкурс пысăк уяв пекех иртрĕ. Район администрацийĕн пуçлăхĕ Г.Ф.Волков, ял хуçалăх управленийĕн начальникĕ Г.М.Киргизов, ЧР Патшалăх Канашĕн депутачĕ, "Урожай" колхоз председателĕ А.Н. Ершов тупăшăва хутшăнакансене ăнăçу сунчĕç, выльăх-чĕрлĕх пăхакансем хуçалăхшăн пĕлтерешлĕ ĕç тунине палăртрĕç. Çавăн пекех ял хуçалăх управленийĕн тĕп зоотехникĕ К.Г.Гимальтдинов, районти ветстанци начальникĕ Р.М.Велимухаметов, ăратлăх енĕпе ĕçлекен Н.И.Емельянов специалист сăмах илсе конкурс условийĕсемпе паллаштарчĕç. Районти çĕнтерỹçĕсене республика шайĕнчи тупăшура ăнăçу сунар.

Первоисточник: "Каçал Ен"