Пирĕн районти кашни ялта тенĕ пекех ял хуçалăх, вĕрентỹ, медицина тата ытти отрасльсенче ĕçлекенсен çемье династийĕсем пур. Май уйăхĕнче "Труд" ялхуçалăх кооперативĕнче ĕçлекен, Аслă Чурачăк ялĕнче пурăнакан Волковсен çемье династийĕ Шупашкарта К.В.Иванов ячĕллĕ Чăваш патшалăх академи драма театрĕнче иртнĕ республикăри ĕç династийĕсен слетĕнчен таврăнчĕ. ЧР Президенчĕн йышăнăвĕпе ĕç династийĕсен пуçаруçине Иван Петрович Волкова "Нумай çул тата тỹрĕ кăмăлпа ĕçленĕшĕн, ăсталăхшăн, ĕç династине упраса ăна аталантарса пынăшăн" тав сăмахĕ каланă, SAMSUNG музыка центрĕпе наградăланă. Волковсен ĕç династийĕ- 175 çул. Иван Петрович Волков 49 çул, çамрăкран пуçласа тивĕçлĕ канăва кайичченех "Заветы Ильича" колхозра тăрăшнă. 1975, 1978, 1980, 1985, 1989 çулсенче тăрăшуллă ĕçлесе пынăшăн ăна хуçалăхри Хисеп хăми çине кĕртнĕ, районăн Хисеп грамотипе наградăланă. Колхоз ăна пĕрре мар хаклă парнесем парса чысланă. "Ĕçри паттăрлăхшăн. В.И.Ленин çуралнăранпа 100 çул çитнĕ ятпа" юбилей медалĕ илме тивĕç пулнă. Ĕмĕрĕпех Иван Петрович фермăра тăрăшнă, выльăх-чĕрлĕх самăртнă, çу кунĕсенче кĕтỹ кĕтнĕ. Хуçалăх экономикине аталантарас тесе нумай тăрăшнă. Халĕ унăн ĕçне ачисем, кинĕсем, мăнукĕ тăсаççĕ. Анатолипе Николай çамрăкранпах фермăра ĕçлеме пуçланă. Кинĕсем Валентина, Галина, Елена та выльăх-чĕрлĕх отраслĕнчех тăрăшаççĕ. Мăнукĕ Денис та фермăра вăй хурать. Аслисен ĕç стажĕ пысăк. Кооператив ертỹçисем вĕсем çинчен ырласа çеç калаçаççĕ. Чăннипех те хăйсене шаннă ĕçе тỹрĕ кăмăлпа, пахалăхпа пурнăçлаççĕ. Производство кăтартăвĕсем те пысăк вĕсен. Волковсене наградăпа саламласа малашне те ăнăçу сунатпăр.

Первоисточник: "Каçал Ен"