Паян районти хуçалăхсем кашни ĕнерен талăкра 12,2-шер килограмм сĕт суса илеççĕ. Пĕлтĕрхи çак вăхăтрипе танлаштарсан, ку кăтарту 100 грамм пысăкрах. Сăлтавĕ паллă ĕнтĕ, ĕнесем кĕтỹре, курăк çинче, уçă сывлăшра. Унсăр пуçне вĕсене пăтратса та çитереççĕ. Районти 10 хуçалăхра сĕт сăвасси кăçал палăрмаллах ỹсрĕ. Чи пысăк сăвăм- асанкассисен. Кунти 150 ĕнерен кашнийĕ паян 18,6-шар килограмм сĕт антарать. "Рассвет" кооперативра та кăçал пĕлтĕрхинчен 1,7 килограмм нумайрах сĕт суса илеççĕ, кашни ĕнерен 17,3-шер килограмм. "Слава" коператив дояркисем те кăçал сăвăма палăрмаллах ỹстерчĕç. Вĕсем хăйсене çирĕплетсе панă ĕнесенчен 15,6-шар килограмм е пĕлтĕрхинчен 1,8 килограмм ытларах сĕт суса илеççĕ. "Искра", "Урожай", "Восток", "Труд" хуçалăхсем те ĕне фермисем çине пысăк тимлĕх уйăраççĕ, кунсерен кашни ĕнерен 14-шар ытла килограмм сĕт суса илеççĕ. Çапла вара хальхи вăхăтра районĕпе пĕр кунхи сăвăм 27,2 тоннăпа танлашать, 23,8 тонни (87 проценчĕ) сутăнать. Унсăр пуçне районта халăхран сĕт пуçтарасси те аван пулса пырать, кунсерен 16 тонна ытла. Уйрăмах ку ĕçе "Асаново" кооперативра (2,9 тонна), "Трудра"(2,7 тонна), "Урожайра" (2,5 тонна), "Дружбăра" (2,2 тонна), "Лучра" (1,8 тонна) аван йĕркеленĕ.

Первоисточник: "Каçал Ен"