Чăваш литературинче паллă йĕр хăварнă çыравçăсем, Шăмăршă районĕнчи Виçпỹрт-Шăмăршăра çуралнă Илпек Микулайĕн (Н.Р.Ильбеков) тата пирĕн районти Аслă Чурачăкра кун çутине килнĕ Николай Патманăн (Н.К.Кириллов) юбилейĕсене май уйăхĕнче паллă тунă. Илпек Микулайĕ 90 çул, Николай Патман 110 çул тултарнă. Районти шкулсенче çак юбилейсем ячĕпе мероприятисем пулнă. Вĕсене асăнса литература каçĕсем ирттернĕ, кĕнекисен выставкисене йĕркеленĕ, стена хаçачĕсем кăларнă, вулав конференцийĕсенче вĕсен произведенийĕсемпе паллашнă. Акă, Н.Патман çуралнă ялта, Аслă Чурачăк вăтам шкулĕнче çыравçа халалласа чĕлхе культури пирки калаçу йĕркеленĕ. Çỹлерех асăннă мероприятисем ачасене тăван чĕлхепе литературăна юратма, çыравçăсен ĕçĕ-хĕлĕпе, пурнăçĕпе, произведенийĕсемпе паллашма май параççĕ. Кăçалхи çул пирĕн районта çуралса ỹснĕ Г.Чаржов (Йăлмахва) поэтăн, Куçма Турхан (Вăрманхĕрри Чурачăк) писателĕн юбилейĕсем пулĕç. Вĕсене асăнса мероприятисем ирттерессе шанас килет.

Первоисточник: "Каçал Ен"