"Урмай моны" фестивалĕн пĕрремĕш концерчĕсене хамăр тăрăхри тутар юрăçисем çеç хутшăннă пулсан, çулсем иртнĕçемĕн унăн пĕлтерĕшĕ ỹссе пынă. Кỹршĕ районти артистсем çеç мар, тĕрлĕ республикăсенчен те юрра-ташша юратакансем килме пуçланă. Темиçе çул ĕнтĕ "Урмай моны" фестиваль Урмаелĕнче пуçланать те тĕп хуламăрта Шупашкарта вĕçленет. Кăçал фестиваль майăн 27-мĕшĕнче уçăлчĕ. Унта Чăваш Ен, Тутарстан, Пушкăртстан Республикисенчи, Самар, Тюмень, Чулхула облаçĕсенчи 40 яхăн юрăç хутшăнчĕ. "Нурлай", Тутарстанри "Саф хислер" трио, пирĕн районти Чĕчкен ялĕнчи Гузелия Зинетуллина, Патăрьел рай-онĕнчи Альфия Янтыкова лауреат ята çĕнсе илчĕç. Гузелияпа Альфия Комсомольски тата Патăрьел районĕсен администрацийĕсен пуçлăхĕсен призĕсене, Хусанти культурăпа искусство патшалăх университетĕнче 4-мĕш курсра вĕренекен Резине Гибатдинова фестивале йĕркелес ĕçре хастар пулнăшăн хаклă парнене тивĕçрĕç. Фестивале хутшăнакансем тепĕр кунне Шăнкăртамри, майăн 29-мĕшĕнче Урмаелĕнчи "Сабантуйсенче" хăйсен пултарулăхне кăтартрĕç. Унта чăваш, тутар, турккă, пушкăрт, азербайджан чĕлхисемпе юрăсем янăрарĕç. "Урмай моны" ХIХ фестиваль тепĕр çул тĕп хуламăрта, Шупашкарта иртĕ.

Йăлана кĕнĕ тăрăх, майăн 29-мĕшĕнче Урмаелĕнче "Сабантуй" уявĕ пулса иртрĕ. Ял халăхĕпе пĕрле савăнма çĕршывăн тĕрлĕ кĕтесĕсенчен ентешсем нумайăн килсе çитнĕ. Уява хутшăнакансене район администрацийĕн пуçлăхĕ Г.Ф.Волков, Урмаел ял администрацийĕн пуçлăхĕ М.М.Зайнуллин, "Алга" ял хуçалăх кооперативĕн председателĕ Г.Г.Апраков тата ытти хăнасем саламланă. Спорт площадкинче хĕрỹ тупăшусем пулнă. Уява сăн кĕртекенни, паллах, тутарла-пушкăртла кĕрешỹ пулнă. "Урмай моны" фестивале хутшăннă артистсем гала-концерт кăтартнă. Хăнтăрла юханшывĕ хĕрринче юрă-кĕвĕ сасси сĕм çĕрлечченех тăсăлнă.