Районти кашни ялта тенĕ пекех пасарсем ĕçлеççĕ. Анчах çак пасарсем хăйсем тĕллĕн йĕркеленнĕскерсем. Вĕсем валли саккун тăрăх вырăн уйăрман, регистрацилемен. Çитменнине, апат-çимĕç сутакансен холодильниксем те çук. Тусан, хĕвел çинчех хăвăрт пăсăлакан çимĕçсемпе сутă туни те пулать. Ятарлă инвентарь, водопровод çукки çинчен каламалла та мар. Çак лару-тăру районти санитарипе эпидемие хирĕçле комиссие тивĕçтермест. Çакă халăх сывлăхне сиен кỹме пултарать-çке. Ыйтăва комиссин иртнĕ ларăвĕ пăхса тухса çапла йышăну турĕ: çуллахи вăхăтра ялсенчи пасарсенче апат-çимĕç продукчĕсемпе суту-илỹ тума чарас. Райцентрта вара апат-çимĕç сутакансен хăйсен прилавокĕсене "Таныш" пасар территорийĕнче вырнаçтармалла. Холодильниксем, ятарлă инвентарь пулмасан предпринимательсен штраф тỹлеме тивĕ. Çак йышăну мĕнле пурнăçланнине ял администрацийĕсем, Патăрьелĕнчи санэпиднадзор центрĕн районти филиалĕн ĕçченĕсем тĕрĕслесе тăрĕç.

Первоисточник: "Каçал Ен"