Çĕршывра фермер юхăмĕ аталансах пырать. Уйрăм çынсем çĕр илсе унта уй-хир культурисем туса илеççĕ, пахчаçимĕç, тырпул, çĕрулми çитĕн-тереççĕ. Район центрĕнчи Минатуллин фермер хуçалăхĕнче республикăри хресчен (фермер) хуçалăхĕсен ассоциацийĕн вырăна тухса ирттернĕ ларăвне йĕркеленĕ. Унта республикăри 8-9 районтан килнĕ фермер хуçалăхĕсен ертỹçисем хутшăнчĕç. Калаçу, тĕпрен илсен, ялсенче фермер хуçалăхне аталантарас енĕпе пулчĕ. Ларăва килнисем çĕнĕ вăрлăх, удобрени, техника пирки сĕнỹсем илчĕç. Хресчен (фермер) хуçалăхĕн ассоциацийĕн совечĕ пулăшу ыйтса РФ Президенчĕ В.Путин патне те çырупа тухнă. Лару ĕçне Мускав, Ижевск хулисен тата ытти республикăсен представителĕсем хутшăнчĕç. ЧР ялхуçалăх министрĕн çумĕ С.П.Дмитриев фермерсене республикăри ял хуçалăх отраслĕн кăтартăвĕсемпе паллаштарчĕ, малашнехи тĕллевсем пирки чарăнса тăчĕ. Ларура РФ аграри партийĕн республикăри филиалĕн представителĕсем те пулчĕç. Вĕсем ял хуçалăхне аталантарас енĕпе тухăçлă ĕçленĕшĕн тата аграри партийĕн тĕллевĕсене пурнăçласа пынăшăн "Рассвет" ял хуçалăх кооперативĕн председательне М.Р.Афанасьева Т.Г.Мальцев ячĕллĕ медаль парса чысларĕç. Унччен ăна пирĕн районтан ял хуçалăх управленийĕн тĕп агрономĕ И.Х.Минетуллин тивĕçнĕччĕ. Фермерсем Минатуллинăн хуçалăхĕпе паллашрĕç.

Первоисточник: "Каçал Ен"