Медицина ĕçченĕсен кунне халалласа республика шайĕнче кашни çулах ăмăртусем иртеççĕ. Кăçал та спорт уявĕ майăн 18-мĕшĕнче пулчĕ. Яланхи пекех, тупăшура пирĕн районти шур халатлă ĕçченсем те вăй виçрĕç. Каласа хăвармалла, ЧР Сывлăха сыхлас ĕç министерстви тата республикăри профсоюз комитечĕ çулленех çакăн пек спорт уявĕсем ирттересси çине пысăк тимлĕх уйăраççĕ. Çулла та, хĕлле те пулаççĕ вĕсем. Медработниксем час-часах тĕрлĕ енлĕ ăмăртаççĕ. Шур халатлă ĕçченсем сывă пурнăç çулĕ çинче пулнине хăйсем кăтартса пыни пысăк вырăн йышăнать. Çакăнта вара коллективри туслăх çирĕпленет, ытти районсенчи коллегăсене курса калаçни кăмăла уçать. 60 метрлă дистанцие яланхи пекех А.Самаркин (васкавлă пулăшу уйрăмĕ) тата А.Горбунов (хурал) лайăх кăтартусемпе вĕçлерĕç. Хĕрарăм-ветерансем хушшинче вара Г.Гаврилова (Шурут офисĕ) тата Н.Григорьева (ача-пăча уйрăмĕ) медсестрасем ырă тĕслĕх кăтартрĕç. 400 метрлă дистанцире Э.Индюковпа (васкавлă пулăшу) О.Абросимов (МСГО) фельдшерсем çивĕч ăмăртрĕç. 100 метрлă дистанцире Э.Замкова (хирурги уйрăмĕ) тата Е.Павлова (инфекци уйрăмĕ) хастар хутшăнчĕç. Çаксемех арçынсен тата хĕр-арăмсен эстафетисенче çĕнтерме сахал мар вăй хучĕç. Арçынсен футбол команди елчĕксене парăнтарчĕ, ун хыççăн вĕсенех вĕрен туртса вăй виçмелле пулчĕ. Волейбол уйĕнче те вă-йăсем çивĕч иртрĕç. Хĕрарăмсен командине А.Козлова акушер-гинеколог ертсе пычĕ. Çĕнтерес туйăм пысăк пулчĕ вĕсен, пĕр-пĕрне хавхалантарса пынипе финала çитме пултарчĕç. Команда ăнăçлă вылятăр тесе И.Ефремова, Е.Белкова, Н.Краснова, Л.Григорьева (пурте поликлиникăран) тата К.Константинова(Йăлмахвари ФАП) тăрăшрĕç. Çакăн пек ăмăртусене эпĕ, районти больницăра спорт енĕпе ертỹçĕ пулнă май, 15-мĕш хут хутшăнтăм. Командăран кам та пулин призерсен шутне кĕменни нихçан та пулман. Кăçал та хĕрсен волейбол команди иккĕмĕш вырăн, А.Самаркинпа Н.Волков кире пуканĕ йăтса виççĕмĕш призер пулчĕç(пĕлтĕр пĕрремĕшчĕ). Ку кăтартусем, паллах, ахаль пулмаççĕ, яланах тренировкăсем ирттерни ỹсĕмсем тума май парать.

Первоисточник: "Каçал Ен"