Комсомольбски районĕнчи "Восток" ЯХПК вăйлă аталаннă хуçалăхсенчен пĕри. Унăн ертỹçи Валерий Геннадьевич Михеев хăçалăх тилхепине 1998 çултанпа çирĕп алăра тытать. Кооператив 2001 çултанпа мăйракаллă шултра выльăх, 2002 çултанпа вара сысна ерчетес енĕпе ĕçлет. Ахальтен мар ĕнтĕ республика шайĕнче ирттерекен дояркăсен 26-мĕш, осесенаторсен 24-мĕш ăмăртăвне çак хуçалăхра ирттерме палăртнă. Конкурса вырăнти ăмăртура мала тухнă дояркăсемпе осеменаторсем 21 районтан хутшăнчĕç. Ăмăрту икĕ кун хушши тĕрлĕ тапхăрпа иртрĕ: ĕне сума тĕрĕс хатĕрленесси (ĕнепе чуптарма йĕркелесси), сĕт сăвакан аппарата салатса пуçтарасси(лабораторинче ĕçлесси), теори ыйтăвĕсене хуравласси. Комисси членĕсем кашни ăмăртăва хутшăнакана çирĕп йĕркепе тĕрĕслерĕç. Ытларах йăнăшсем ĕне çиллине çăвассинче тата коллектор çине алла тĕрĕс мар хурассинчи пулнине пĕлтерчĕç. Паллах, ăмăртакансене ăнланма пулать- пăлхануллă самантсем. Ăмăрту вĕçленнĕ хыççăн комисси председателĕ пĕтĕмлетỹ турĕ, çĕнтерỹçĕсене палăртрĕ. Дояркăсен хушшинче чи пултарулли Валентина Михайловна Андреева пулчĕ (Етĕрне районĕнчи "Заветы Ильича" хуçалăх). Пĕрремĕш вырăн тухнăскере- телевизор парса хавхалантарчĕç. Иккĕмĕшпе виççĕмĕш вырăнсене Вера Александрова Николаевăпа (Шупашкар районĕнчи "Приволжски" вĕрентỹ хуçалăхĕ) Зоя Яковлевна Михеева (Комсомольски районĕнчи "Восток" хуçалăх) йышăнчĕç. Вĕсене укçан парне парса чысларĕç. Осеменаторсен ăмăртăвĕнче пĕрремĕш вырăна Галина Владимировна Павлова (Тăвай районĕнчи Ленин ячĕллĕ хуçалăх), иккĕмĕш вырăна Елена Алексеевна Семенова (Вăрмар районĕнчи "Арабоси" ТЯО), виççĕмĕш вырăна Валентина Николаевна Подгорова (Шупашкар районĕнчи "Атлашевский" хуçалăх) тухрĕç. Çĕнтерỹçĕсене чыслама ял хуçалăх министрĕ Михаил Васильевич Игнатьев ятарласа хăй килчĕ. Саламланă хыççăн çапла хушса хучĕ: "Николай Васильевич Президент çакăн пек ăмăртусене ырлать, вĕсене ирттерме пулăшу та парать. Ыран паянхинчен лайăхрах пурăнмалла пултăрччĕ". Унăн шухăшĕпе Валерий Геннадьевич Михеев та килĕшрĕ: - Çакăн пек конкурссем ирттерни пире çĕнĕлле ĕçлеме вĕрентет. Тĕрлĕ районти хуçалăхран пухăннă дояркăсемпе осеменаторсем пĕр-пĕрин опычĕпе паллашаççĕ. Хăйсен шухăшлавне улăштараççĕ. Пĕрле канашласа савăнаççĕ, малалла ĕçлеме çĕнĕ вăй-хал илсе каяççĕ. Ăмăрту çинчен каланă ытти шухăш-кăмăлпа тата çĕнтерỹçĕсен хавхаланăвĕпе эсĕ, вулаканăм, çитес юнкун 14 сехет те 10 минутра "Ял хуçалăх хыпарĕсем" телекăларăмра паллашма пултаратăн. 

Первоисточник: "Хыпар"