Ачасем питĕ кĕтекен çуллахи каникул кунĕсем çитрĕç. Çак вăхăтра ашшĕ-амăшне пĕр ыйту канăç памасть- ачасене канма ăçта ямалла? Ку, паллах, малтанах çемье бюджетĕнчен килет. Çак тĕлĕшпе патшалăх ачасене мĕнле пулăшать-ха? Яланхи пекех ку задачăна татса парасси социаллă страховани фончĕ çине тиенет. 2005 çулта патшалăх ачасен канăвĕ валли 12,6 миллиард тенке яхăн тăкаклама палăртнă. Социаллă страхованин пирĕн республикăри уйрăмĕ ачасем валли 60,7 миллион тенкĕ ытла уйăрать. Çуллахи вăхăтра пирĕн районти 100 ача сывлăхĕсене Канаш районĕнчи "Космонавт" лагерьте çирĕплетме пултарать. Çуллахи каникул кунĕсенче ачасем ашшĕ-амăшне кил-çуртра тата уй-хир ĕçĕсенче пулăшаççĕ. Кăçал районти 9 шкулта сывлăха çирĕплетекен лагерьсем ĕçлеççĕ. Унта 365 ача çỹрет. Лагерьсенче ачасене тутлă та сĕтеклĕ апат çитереççĕ. Воспитательсем тĕрлĕ мероприятисем ирттереççĕ. Вĕренекенсем сывлăхне çирĕплетчĕр, интереслĕ те усăллă канччăр тесе хăйсенчен мĕн килнине пурне те тума тăрăшаççĕ. Çавăн пекех, соцстрах ачасен сывлăхĕсене санаторисемпе курортсенче сиплемелли путевкăсем уйăрать. Ăна предприятисенче ĕçлекенсене- Социаллă страховани фончĕн страхователĕсен ачисене- параççĕ. Хăшпĕрисем тỹлевсĕр путевка илеççĕ. Ыйтăва предприятири социаллă страхованин ятарлă комиссийĕ татса парать. Ĕçлекенĕн çак тĕллевпе маларах заявлени çырса памалла. Путевкăсене ашшĕ-амăшĕнчен пĕрне параççĕ. Çуллахи вăхăтра ача валли тỹлевсĕр пĕр путевка анчах параççĕ. Йышлă, тулли мар, опекунлă е урăх çемьере çитĕнекен ачасене тỹлевсĕр икшер путевка уйăрма пултараççĕ. Ку ыйтусемпе эсир социаллă страховани фончĕн пирĕн районти уйрăмне çак адреспа пыма пултаратăр: Заводская урам, 57-мĕш çурт, 30-мĕш кабинет, телефон номерĕ: 5-21-68.

Первоисточник: "Каçал Ен"