Пирĕн районти выльăх-чĕрлĕх пăхакансем çулсеренех пысăк кăтартупа ĕçлесе пыраççĕ. Кашни ĕнерен сĕт суса илес енĕпе кăçал Етĕрне тата Муркаш районĕсенчи ĕçченсем хыççăн виççĕмĕш вырăн йышăнаççĕ. Ăратлăхпа та вăй хураççĕ. Çак енĕпе ăнăçлă ĕçлекен хуçалăхсенчен пĕри _ "Восток" ял хуçалăх кооперативĕ. Машинăпа сĕт сăвакан операторсен тата выльăхсене искус-ствăлла майпа пĕтĕлентерес енĕпе ĕçлекен техник-осеменаторсен республикăри кăçалхи конкурсне çак хуçалăхра ирттерни пысăк чыс. Ăмăртăва пур районти ĕçченсем те хутшăнчĕç. Малтанхи кунах тупăшăва савăнăçлă лару-тăрура уçрĕç. Пĕлтĕрхи çĕнтерỹçĕсем ялав çĕклерĕç. Конкурса уçса ЧР ял хуçалăх министрĕн çумĕ В.Е.Александров, район администрацийĕн пуçлăхĕ Г.Ф.Волков тухса калаçрĕç, дояркăсемпе техник-осеменаторсене ăнăçу сунчĕç. Ун хыççăн тупăшăва хутшăнакансем теориллĕ ыйтусем çине хуравларĕç. "Восток" ял хуçалăх кооперативĕ _ районта ăратлăх енĕпе ăнăçлă ĕçлекен хуçалăх. Ĕнесем çỹрекен вырăнпа, фермăпа, витесемпе паллашни чылайăшĕн кăмăл-туйăмĕнче ырă шухăш хăварчĕ. Каçкỹлĕм вара дояркăсем ĕнесем çывăхĕнче пулчĕç. Сĕт сума хатĕрленес тата сăвас ăсталăха кăтартрĕç. Техник-осеменаторсем ĕнесене пĕтĕлентерес ăсталăха практикăра çирĕплетрĕç. Иккĕмĕш кунхине дояркăсемпе операторсем ирех ĕçе пикенчĕç. Дояркăсем ĕне сумалли аппаратсене вăхăтпа сỹтсе пухрĕç, осеменаторсем хăйсен ĕçĕнчи ăсталăхне кăтартрĕç. Жюри членĕсем пĕтĕмлетỹ тунă вăхăтра конкурсантсене районти культура çурчĕн ĕçченĕсем, "Каçал" фольклор ушкăнĕ, искусство шкулĕн воспитанни-кĕсем юрă-ташăпа савăнтарчĕç. М.Волкова, А.Герасимова, Л.Носова, Альбинăпа Виктор Кокшинсем юрланине уйрăмах ăшшăн йышăнчĕç хăнасем. Акă, конкурс пĕтĕмлетĕ-вĕсене пĕлтермелли вăхăт çитрĕ. Дояркăсем хушшинче Етĕрне районĕнчен килнĕ Валентина Андреева республикăри 26-мĕш конкурсăн çĕнтерỹçи пулса тăчĕ. Осеменаторсен республикăри тупăшăвĕ вара кăçалхипе çирĕм тăваттăмĕш хут иртрĕ. Кунта чи ăсти, пултарулли Тăвай районĕн представителĕ Галина Павлова тесе йышăнчĕç. Пирĕн районтан хутшăннă конкур-сантсем те лайăх кăтартусемпе савăнтарчĕç. "Восток" кооператив доярки Зоя Михеева пьедесталăн виççĕмĕш картлашки çине çĕкленчĕ. Çак хуçалăхри Елена Исаева осеменатор вара ял хуçалăхĕнче ĕçлекенсен профсоюз рескомĕн ятарлă парнине тивĕçрĕ. Çĕнтерỹçĕсене Чăваш Республикин Министрсен Кабинечĕн председателĕн çумĕ- ял хуçалăх министрĕ М.В.Игнатьев, Комсомольски район администрацийĕн пуçлăхĕ Г.Ф.Волков хаклă парнесемпе, дипломсемпе, ытти участ-никсене вара Ял хуçалăх министерствин Тав хучĕпе, укçан премисем парса чысларĕç, çитĕнỹсемпе саламларĕç, малашнехи ĕçре ăнăçусем сунчĕç.

Первоисточник: "Каçал Ен"