Иртнисĕр пуласлăх çук теççĕ. Хăйĕн йăхĕн, ялĕн, Тăван çĕршывĕн историне вырăна хуман çын хăйне те хисеплемест. Анат тата Тури Тимĕрч-касси ялĕсенче пурăнакансем пирки вара çапла калаймăн. Вĕсем историе тĕпчесе пĕлсе иртнĕ çул тăван ялĕсен 400 çулхи юбилейне питĕ анлăн паллă турĕç. Пурнăç уявсенчен кăна тăмасть пулин те, уявсăр та пурнăç çук. Ял ĕçченĕсене хĕрỹ ĕççи вăхăчĕсем _ утçи, вырма пуçланиччен канса вăй пухма май туса парас тесе хуçалăх правленийĕ çак йăлана малалла тăсма йышăнчĕ. Питравра, Петрпа Павăл апостолсен уявĕнче, çулсеренех ял кунне ирттерес терĕç. Кăçал Питрав ытларикуна лекрĕ пулин те, çак кун шкул çумĕнчи лапама халăх йышлăн пухăнчĕ. Ентешсемпе пĕрле савăнма кỹршĕ ялсенчен те чылайăн килнĕ. Пирваях вăйă картине тăнă хĕрсемпе каччăсем хăйсем патне илĕртрĕç. Савăнăçлă саманта "Луч" ЯХПК председателĕ А.П.Капитонов уçрĕ, ял çыннисене уяв ячĕпе саламларĕ. Аякран та çывăхран килнĕ хăнасем те _ райадминистраци пуçлăхĕн çумĕ Юрий Скворцов, ЧР культура, национальноçсен ĕçĕсен, информаци политикин тата архив ĕçĕсен министрĕн çумĕ Олег Петров, ЧР Патшалăх Канашĕн депутачĕ Юрий Моисеев, ЧР тава тивĕçлĕ тренерĕ Владимир Семенов тата ыттисем те тимĕрчкассисене ырă сунчĕç. Уй-хирте, выльăх-чĕрлĕх отраслĕнче ĕçлекенсене хуçалăх правленийĕ укçан премисемпе чысларĕ. Икĕ ялта пурăнакансем хушшинче юрă-ташă ăстисем йышлă. Вырăнти художество пултарулăх коллективĕ ял-йыша, хăнасене концертпа савăнтарчĕ. Хĕрлĕчутайран килнĕ спортсменсем вара хăйсен вăйĕпе пĕтĕм халăха тĕлĕнтерчĕç. Тăватă каччăпа пĕр хĕрача кире пуканĕсене футбол мечĕкĕпе вылянă пек пĕр-пĕрне çăмăллăн пере-пере пачĕç, вĕсемпе тĕрлĕ хусканусем турĕç. Ирĕклĕ майпа кĕрешекенсен ăмăртăвĕ те питĕ хĕрỹ иртрĕ. Уяв тавралăх тĕттĕмленичченех пычĕ. Каçхине сакăр сехетре Шупашкартан "Апельсин каччисем" ушкăн, эстрада юрăçисем килсе çитрĕç. Вĕсен кон-цертне курма пĕтĕм ял-йыш пухăнчĕ. Вунă сехетре вара уяв фейерверкĕ тỹпене çутатрĕ.

Первоисточник: "Каçал Ен"