Иртнĕ шăматкун, июлĕн 16-мĕшĕнче, Йĕпреç районĕнчи Пучинке ялĕ çывăхĕнче Чăваш Республикинчи патшалăх влаçĕн тата вырăнти самоуправлени органĕсенче ĕçлекенсен IV Спартакиади пулса иртрĕ. Ăмăртусене ЧР Президент Администрацийĕн ертỹçи Петр Краснов уçрĕ. Ăмăртусене хутшăнакансене Йĕпреç районĕн администраци пуçлăхĕ Геннадий Яковлев, ЧР физкультурăпа спорт министрĕ Вячеслав Краснов, "Красный партизан" колхоз председателĕ Анатолий Петров саламларĕç. Комсомольски район администрацийĕн команди тăватă тĕрлĕ ăмăртăва хутшăнчĕ: комбинированнăй эстафетăра, автомобильпе фигурăсем туса çỹрессинче, триатлонра, поварсен конкурсĕнче тупăшрĕ. Кашни ăмăртура лайăх кăтартусемпе палăрчĕ. Сăмахран, район администрацийĕн пуçлăхĕ Г.Ф.Волков автомобильпе çỹрессипе палăрчĕ. Анатолий Давыдов триатлонист та аван кăтарту турĕ. Поварсен конкурсне пирĕн районти райпо ĕçче-нĕсем хутшăнчĕç. Вĕсене район администрацийĕн специалисчĕсем хаваспах пулăшрĕç. Р.Велимухаметовăпа В.Краснова поварсем "Пальчики оближешь" (апат пахалăхĕшĕн) номинацире çĕнтерчĕç. Хаçатра пĕлтернĕччĕ ĕнтĕ, пирĕн район команди "Урожай" спорт обществи ирттерекен республикăри ăмăртура пĕрремĕш вырăн йышăннă. Çак спартакиадăра вара вĕсене савăнăçлă лару-тăрура чысларĕç.

Первоисточник: "Каçал Ен"