Районти чылай каччă Чечен республикинче службăра пулнă. Вĕсен хăйсен куçĕпе вăрçă вут-çулăмне те, унăн хăрушлăхне те курма, тỹсме тивнĕ. Комсомольски ялĕнче çуралнă Дмитрий Ишеев малтан Владимир облаçĕнчи çар чаçĕнче службăра тăнă. Ковров хулинче сержантсем хатĕрлекен шкула пĕтернĕ. Çур çултан ăна Чечен республикине илсе кайнă. Унти Шатой районĕнчи Борзое ялĕнче салтак тивĕçне пурнăçланă. Пĕр çапăçура вăл питĕ йывăр аманнă. Хальхи вăхăтра вăл Мускав облаçĕнчи Çар тĕп клиника госпиталĕнче сипленет. РФ Президенчĕн 2004 çулхи февралĕн 19-мĕшĕнчи Указĕпе Дмитрий Алексеевич Ишеев кĕçĕн сержанта "Паттăрлăхшăн" медальпе наградăлама йышăннă. Иртнĕ тунтикун салтака район администрацийĕн пуçлăхĕ Г.Ф.Волков савăнăçлă лару-тăрура медаль çакса ячĕ.

Первоисточник: "Каçал Ен"