Районти ял хуçалăх управленийĕ тăтăшах выльăх-чĕрлĕх пăхакансен семинар-канашлăвне ирттерет. Унта малашнехи тĕллевсене палăртаççĕ, çитменлĕхсем пирки калаçаççĕ, паха опытпа паллашаççĕ. Черетлĕ семинар-канашлăва "Рассвет" ял хуçалăх кооперативĕнче ирттерни ахальтен мар. Кунта выльăх-чĕрлĕх отраслĕ çине пысăк тимлĕх уйăраççĕ. Çулсеренех çителĕклĕ таран выльăх апачĕ хатĕрлеççĕ. Апат пулсан вара сĕчĕ те пур, выльăхсем те самăрăлаççĕ. Кăçалхи çур çулта "Рассвет" ял хуçалăх кооперативĕ пурĕ 537 центнер аш-какай, 2239 центнер сĕт туса илнĕ. Кашни ĕнерен сĕт сăвас, 100 гектар çĕр пуçне сĕт, аш-какай туса илес енĕпе те районта пĕрремĕш вырăнта. Акă, 100 гектар çĕр пуçне районăн вăтам кăтартăвĕнчен 3 хут ытларах аш-какай, 2 хута яхăн нумайрах сĕт туса илнĕ. Самăртма хупнă мăйракаллă шултра выльăхсем талăксерен 464-шар грамм, сыснасем 344-шар грамм ỹт хушса пынă. Мăйракаллă шултра выльăх йышне хăшпĕр çĕрте чакараççĕ пулсан, кунта 20 ытла пуç ỹстернĕ те. Семинар-канашлăва хутшăнакансем малтанах фермăна çитсе курнă. Ун хыççăн çуллахи лагерьте, комбикорм хатĕрлекен мини-цехра пулса унти ĕç-хĕлпе паллашнă. Кунта сыснасене типĕ меслетпе №сухое кормление№ тăрантараççĕ. Ăнланмалларах каласан, комбикорм çитереççĕ. Ĕнесене кĕтĕве кăларсан электрокĕтỹçпе усă кураççĕ. Çакă ĕнесене курăксене типтерлĕ çитерсе пыма май парать. Канашлăва ял хуçалăх управленийĕн начальникĕ Г.М.Киргизов уçнă. Ял хуçалăх управленийĕн тĕп зоотехникĕ К.Г.Гимальдинов районти выльăх-чĕрлĕх отраслĕ кăçалхи пĕрремĕш çур çулта мĕнле ĕçлесе пыни, малашнехи тĕллевсем пирки доклад туса панă. Çу кунĕсенче выльăхсен продуктивлăхне ỹстерес енĕпе çине тăрса ĕçлемеллине палăртнă. Районти ветстанци начальникĕ Р.М.Велимухаметов выльăх-чĕрлĕх чирĕсене хирĕç кĕрешес, профилактика ĕçĕсене вăйлатас ыйтусем пирки калаçнă. Районта инфекциллĕ хăрушă чирсем сиксе тухман пулин те, вĕсемпе кĕрешес тĕлĕшпе лăпланса ларма юраманни пирки асăрхаттарнă. "Çамрăк выльăхсăр кĕтỹ çĕнелмест, аталанаймасть. Çавăнпа та хуçалăхсен ăратлăх пирки ытларах тимлемелле",- палăртнă районти ăратлăх енĕпе ĕçлекен тĕп зоотехник Н.И.Емельянов. Канашлура ыйтусем те чылай пулнă. Паянхи кăткăс вăхăтра çапла кирлĕ те. Пĕр-пĕринпе канашламалла, сĕнỹсене шута илсе ĕçлемелле. Канашлу ĕçне район администрацийĕн пуçлăхĕ Г.Ф.Волков пĕтĕмлетнĕ. Темĕнле йывăр пулсан та выльăх йышне чакармалла мар, вĕсен продуктивлăхне ỹстерес тĕлĕшпе мĕн май килнĕ таран тăрăшмалла. Семинар-канашлăва хутшăннисем "Рассвет" ял хуçалăх кооперативĕнчен вĕренсе, унти паха опытпа паллашса хăйсен ĕçне çĕнĕлĕхсем кĕртессе шанас килет.

Первоисточник: "Каçал Ен"