Юлашки вăхăтра чăваш халăхĕн тахçанхи ырă йăли-йĕркисем тепĕр хут пурнăçа кĕме пуçларĕç. Акă, июлĕн 12-мĕшĕнче Хырхĕрринче те Питрав уявĕ интереслĕ те асра юлмалла иртрĕ. Маларах вара эпир культработниксемпе тата хĕрарăмсен совечĕпе (председателĕ Надежда Корнилова) пĕрле çак ырă йăлана çĕнетессипе нумай ĕçлерĕмĕр. Ватă çынсемпе тĕл пултăмăр, вăйă юррисем çырса илтĕмĕр. Кайран вара пикенсех праçнике хатĕр-лентĕмĕр. Акă, кĕтнĕ кун çитрĕ. Ял çыннисем уяв ирттермелли вырăна пухăнчĕç. Малтанах Хырхĕрри ял администрацийĕн пуçлăхĕ Анатолий Воробьев сăмах илчĕ. Пурне те уяв ячĕпе саламларĕ, ăна çỹллĕ шайра ирттерме ырлăх-сывлăх сунчĕ. Вăйă пуçланчĕ. Ялти ватăсемпе çамрăксем унта хуркайăкĕсем пек карталанса юрларĕç. Вăйăсем вылярĕç, ташларĕç. Ĕлĕк-авалхи йăла-йĕркепе килĕшỹллĕн поварсем пысăк хуранпа така шỹрпи пĕçерчĕç. Пурте пĕрле шỹрпе çирĕмĕр, кăпăклă сăра ĕçрĕмĕр. Тавра ра çурçĕр çитичченех юрă-ташă кĕвви илтĕнсе тăчĕ. Вăл аякка-аякка саланчĕ. Уяв интереслĕ те асра юлмалла иртрĕ. Ял çыннисем малашне ăна çулсеренех палăртма пулчĕç. Çакна та калас килет, Фаина Кополухина, Светлана Белкова, Надежда Хлебникова, Людмила Илеменова, Ольга Попова уйрăмах активлă пулнине, çынсене савăнăç кỹрес ĕçре пысăк тăрăшулăх кăтартнине палăртмалла.

Первоисточник: "Каçал Ен"