Чăваш Республикин Президенчĕн Н.Федоровăн "Парксемпе садсен çулталăкĕ çинчен" Указне пурнăçласа районти ялсене, урамсене, предприятисемпе организацисен, учрежденисен территорийĕсене, уйрăм çынсен хуçалăхĕсене тирпей-илем кĕртес пирки районта ятарлă конкурс йĕркеленĕччĕ. Комисси ĕçне район администрацийĕн пуçлăхĕн заместителĕ, вĕрентỹ управленийĕн начальникĕ Н.А.Максимов йĕркелесе пычĕ. Çак вăхăт тĕлне ял администрацийĕсем, предприятисемпе организацисем, учрежденисем комиссие тивĕçлĕ материалсем тăратрĕç. Ялсене тирпей-илем кĕртес, симĕс тум тăхăнтарас номинацире Нĕркеç ялĕ пĕрремĕш вырăн çĕнсе илчĕ. Комисси членĕсем иккĕмĕш вырăна никама та памарĕç. Виççĕмĕш вырăн- Хирти Явăш ялĕн. Организацисемпе учрежденисем хушшинчи конкурсра Шурутри пĕтĕмĕшле практика врачĕн уйрăмĕ çĕнтерчĕ. Виççĕмĕш вырăн- Хирти Выçлири шкул-ача сачĕн. Социаллă сферăри учрежденисем хушшинчи конкурсра вара районти ачасен искусство шкулĕ пĕрремĕш, районти культура çурчĕ виççĕмĕш вырăнсене тивĕçрĕç. Тепĕр номинаци- уйрăм хуçалăхсем. Кунта Хирти Выçлири Новая урамри Владимир Николаевич Гордеев хуçалăхĕ пĕрремĕш вырăн çĕнсе илчĕ. Иккĕмĕш вырăн- Тутар Эльпуçĕнчи Зинур Зайнуллович Низамов хуçалăхĕн. Çак ялти Ремис Мансурович Мансуровăн хуçалăхне комисси членĕсем виççĕмĕш вырăн парас терĕç. Территорисене чечек клумбисемпе илемлетес енĕпе Шурутри пĕтĕмĕшле практика врачĕн уйрăмĕ палăрчĕ, вăл çак номинацире çĕнтерчĕ. Çĕнтерỹçĕсене пурне те укçан преми парса чыслаççĕ. Суммисем пĕчĕк мар. Шел пулин те, хăшпĕр ял администрацийĕсем çак конкурса хутшăнмарĕç. Апла пулсан, вĕсен кăтартмалли ним ырри те çук пулĕ. Паянхи кун конкурс пĕтĕмлетĕвĕсем хатĕр, паллашсамăр вĕсемпе.

Первоисточник: "Каçал Ен"