Хуçалăхра вырма ĕçĕсем хĕрсех пыраççĕ. 50 гектар тулла, 40 гектар урпана çапса пĕтернĕ. Кашни гектартан 22 центнер тулă, 32 центнер урпа тухрĕ. Ир пулакан çĕрулми те аван çитĕнчĕ. Çак кунсенче ăна 5 гектар лаптăк çинчен кăлартăмăр. Çавăн чухлех хĕрлĕ кăшман пур. Ăна та пахчаçимĕç туянакансем ыйтнине курса кăларатпăр. Хуçалăхра пухса илнĕ культурăсен лаптăкĕсене тасатсах пыратпăр. Улăма çийĕнчех тюклатпăр, кĕрхи çĕртме тăватпăр. Кунта Р.Тихонов, С.Жуков, А.Тихонов, С.Ялюков, Г.Жуков трактористсем тăрăшаççĕ. Нумай çул ỹсекен курăксем 90 гектар йышăнаççĕ. Халĕ вĕсене А.Семенов тракторист иккĕмĕш хут çулать. Выльăх-чĕрлĕхе ăнăçлă хĕл каçарма утă-улăм çителĕклĕ хатĕрлетпĕр. Çакна та калас килет, пирĕн хуçалăхра ĕç аллисем сахалрах. Ку йывăрлăхран тухма май тупрăмăр. Тукай Мишерĕнчи хĕрарăмсемпе килĕшỹ турăмăр, вĕсене кашни ир автомашинăпа кайса илетпĕр, каçхине леçетпĕр. Вĕсем пире кĕрхи ĕçсене вăхăтра вĕçлеме пулăшаççĕ. Кунта Равия Камальт-динова бригадир пуçаруллă пулнине те палăртмалла. Ĕççине хутшăнакансене кăнтăрла тата каçкỹлĕм вĕри апат çитеретпĕр.

Первоисточник: "Каçал Ен"