Лашасен ăмăртăвĕ- спортăн илемлĕ, тыткăна илекен, илĕртỹллĕ, киленĕçлĕ тĕсĕ. Ахальтен мар ĕнтĕ унпа кăсăкланакансен шучĕ çулсеренех ỹссе пырать. Çавăнпа та халь урхамахсене пĕрлешỹллĕ хуçалăхсенче çеç мар, уйрăм çынсем те килĕсенче тытаççĕ. Пирĕн районта та пур спортăн ку енĕпе "чирлисем". Вĕсем хăйсен лашисемпе кỹршĕ районсенче, облаçсемпе республикăсенче иртекен ăмăртусене хутшăнаççĕ, вĕсенчен çĕнтерỹ-пе, парнесемпе таврăнаççĕ. Халиччен пирĕн районта лашасен ăмăртăвĕсене ирттерме ятарлă вырăн çукчĕ пулсан, августăн 20-мĕшĕнче вара ипподром хута кайрĕ. Вăл Комсомольскинче, Кĕтне шывĕ хĕрринче федераллă трассăн сулахай енче вырнаçнă. Ипподрома официаллă майпа уçнă çĕре Чăваш Республикин Президент Администрацийĕн ертỹçи- культура министрĕ Петр Краснов, "Чăвашрегионгаз" ООО генеральнăй директорĕ Кияметдин Мифтахутдинов, "Кĕтне" ентешлĕх председателĕ Валери Туркай, Канаш, Патăрьел, Шăмăршă районĕсен пуçлăхĕсем Сергей Антонов, Николай Глухов, Валерий Фадеев хутшăнчĕç. Район администрацийĕн пуçлăхĕпе Геннадий Волковпа ЧР лаша спорчĕн федерацийĕн тĕп судйи Василий Максимов район çыннисене, хăнасене уяв ячĕпе саламланă хыççăн ăмăртусем пуçланчĕç. Лаша спортне юратакансем Канаш, Комсомольски, Шăмăршă районĕсенчен, Ульяновск облаçĕнчен, Тутарстанран та килнĕ. Пирваях ăмăрту юртă лашасем №рысаксем№ хушшинче иртрĕ. Кунта 23 урхамах хутшăнчĕ. Пĕрремĕш чупура Архипелагпа №З.Заргиров предпринимателĕн, Комсомольски№, Хорезм №Шăмăршă районĕнчен№ тупăшрĕç. Лайăхрах кăтартупа Хорезм финала тухрĕ. Пирĕн районти "Урожай" колхоз урхамахĕсем Мелитопольпа Неопат виççĕмĕш, улттăмĕш чупура финиша маларах çитрĕç. Апла пулин те вăхăчĕ пысăк пулнипе вĕсем финала тухаймарĕç. Юлашки чупăва хутшăнма Хорезм(Шăмăршă), Рамзез (Канаш), Гелиус, Чудесный (иккĕшĕ те Патăрьел районĕнчен), Архипелаг(Комсомольски) утсем тивĕç пулчĕç. Кашни лаша хуçиех финиша маларах çитес тесе утне тем пек хистесе хăваларĕ пулсан та, дистанцие чи малтан Чудесный урхамах çитрĕ. Унăн хуçи _ Анатолий Каргин, Патăрьел районĕнчи "Урожай" хуçалăх председателĕ. Иккĕмĕш вырăнта _ Канаш районĕнчен килнĕ Рамзез. Хорезм _ виççĕмĕш вырăнта. Аван кăтарту тунă 3 ут вара _ Волшебник, Нил, Альпинист "йăпатмăш" финалта хăвăртлăх енĕпе тупăшрĕ. И.Матвеевăн Волшебникĕ №Шăмăршă№ ыттисене кая хăварма пултарчĕ. Лаша спорчĕн ветеранĕсем те çак кун килте чăтса ларайман. Вĕсем №пурте Патăрьел районĕнчен№ çĕнĕ ипподром уçнă çĕре килнĕ çеç мар, хăйсен харсăр çамрăклăхне аса илсе, тепĕр хут ăмăртăва тухрĕç. Финиша Е.Краснов Мелитопольпа пĕрремĕш çитрĕ. Сăмах май каласан, унăн икĕ ывăлĕ çак кун ăмăртусене хутшăнчĕç. Финиша А.Пыркин №Премь-ер№ иккĕмĕш çитрĕ, Н.Кошкин №Алладин№ виççĕмĕш пулчĕ. В.Кеметов №Григорянкăпа№ тăваттăмĕш вырăна юлчĕ. Юланутçăсем хушшинче те тупăшу питĕ хĕрỹ иртрĕ. 8 лашаран финала чи малтан Шупашкарти лаша спорт шкулĕн Эфиопия урхамахĕ çитрĕ. Кĕçĕн Каçал каччи Анатолий Самарин "Трюк" учĕпе иккĕмĕш вырăн йышăнчĕ. Тутарстанри Пăваран килнĕ Диля Фазлиева хĕр-юланутçă шанчăклă Булаткипе дистанцие виççĕмĕш вĕçлерĕ. Çав кун ипподром рекордне те палăртрĕç. Пирвайхи чупурах Хорезм тунă кăтартăва 2 минут та 16 çеккунта çитекенни пулмарĕ. Çĕнтерỹçĕсене район админстрацийĕ хаклă парнесемпе, кубоксемпе, Дипломсемпе чысларĕ. Парнисем те пули-пулми мар, сумлăскерсем: тĕрлĕ тĕспе кăтартакан телевизорсем, микрохумлă кăмака, музыка центрĕсем, кавир, пылесоссем. Асăннă турнира йĕркелесе ирттерме, парнесем туянма спонсорсем пысăк пулăшу панă. Вĕсен шутĕнче _ "Агрокабель", "Энергосервис" ОООсем, "Кооператор" ПК, Комсомольскинчи сĕт, Çĕнĕ Кипеçри сыр завочĕсем, З.Заргиров, А.Шакуров предпринимательсем. Лаша спортне юратакансемшĕн çав кун чăн-чăн уяв пулчĕ. Ăмăртусене курма, çанталăкĕ çиллĕ те сивĕ тăчĕ пулин те, район центрĕнче пурăнакансем те, ялсенчен те йышлăн килнĕччĕ. Федераллă çулпа иртсе каякан автомашинăсен водителĕсем те чарăнса тăрсах ипподромри тупăшусене курчĕç. Малашне кунта йĕркелекен турнирсене хамăр районти лашасем ытларах хутшăнасса шанас килет.

Первоисточник: "Каçал Ен"