ТУКАЙ МИШЕР шкулĕнче паян 290 ача парта хушшине ларать, 31-шĕ- пĕрремĕшсем. Ку шкулта кашни çул ачасен шучĕ ỹссе пырать. Апла пулсан унăн малашлăхĕ те пысăк. Линейка Беслан ачисене асăнса пĕр минут шăп тăнинчен пуçланчĕ. Эмине Багаутдинова шкул директорĕ район администрацийĕн пуçлăхне Г.Ф.Волкова сăмах пачĕ. Геннадий Федорович шкул коллективне, вĕренекенсене, ашшĕ-амăшĕсене çĕнĕ вĕренỹ çулĕ пуçланнă ятпа ăшшăн саламларĕ, ăнăçу, телей сунчĕ. Савăнăçлă линейкăра çул-йĕр участокĕн прорабĕ М.Гинетуллин, педагогика ĕçĕн ветеранĕ Б.Мингалеева, Урмаел ял администрацийĕн пуçлăхĕ М.Зайнуллин, ашшĕ-амăшĕсем тухса калаçрĕç. Район пуçлăхĕ Урмаел вăтам шкулĕнче те пулчĕ, Пĕлỹ кунĕ ячĕпе саламларĕ. Савăнăçлă линейкăна предпринимательсем те хутшăнчĕç, шкула спорт инвентарĕсем парнелерĕç. Вăрманхĕрри Чурачăкран килнĕ Вениамин Белков та икĕ баскетбол мечĕке парса чысларĕ. Урмаелĕнчи "Лейсен" ача сачĕн воспитанникĕсем аслă тусĕсене, хăнасене чăвашла, тутарла, вырăсла юрăсем парнелерĕç, ташăсем те пулчĕç.

ÇĔНĔ МĂРАТ. Район администрацийĕн пуçлăхĕн пĕрремĕш заместителĕ- ял хуçалăх управленийĕн начальникĕ Г.М.Киргизов çĕнĕ вĕренỹ çулĕ пуçланнă ятпа вĕренекенсене, шкул коллективне, ашшĕ-амăшĕсене ăшă сăмахсемпе саламларĕ. Çавăн пекех савăнăçлă линейкăра "Заря" тата "Рассвет" ЯХПК председателĕсем А.Н.Павловпа М.Р. Афанасьев çуллахи кану кунĕсенче хуçалăхсен уй-хирĕсенче тăрăшнă ачасене тав турĕç. Пурне те пĕрремĕш шăнкăрав ячĕпе тулли кăмăлтан саламларĕç. Педагогика ветеранĕ, чылай çул çак шкула ертсе пынă С.И.Басников та шкул коллективне ăшă сăмахсем парнелерĕ. Çак кунах Г.М.Киргизов Тукай пуçламăш шкулне те çитсе курчĕ. Кунта халь 1-4-мĕш класс ачисем çеç вĕренеççĕ, 5-мĕш класран пуçласа база шкулне- Çĕнĕ Мăрата çỹреççĕ.

АСЛĂ ЧУРАЧĂК. 165 çул тултарнă Аслă Чурачăк вăтам шкулĕнче сентябрĕн 1-мĕшĕнче парта хушшине 125 ача ларчĕ. Вĕсенчен улттăшĕ- пĕрремĕш классем. Ачасене, вĕрентекенсене, ашшĕ-амăшĕсене Пĕлỹ кунĕ ячĕпе шкул директорĕ А.Пушкина, "Каçал ен" район хаçачĕн тĕп редакторĕ Л.Голыева, федераллă казначействăн районти уйрăмĕн начальникĕ Л.Читнаева саламларĕç. "Труд" ЯХПК председателĕ В.Николаев вара хуçалăха каникул вăхăтĕнче пулăшнă ачасене тав сăмахĕ каларĕ. Акă, Евгений Григорьевпа (10-мĕш класс) Павел Александров (11-мĕш класс) комбайнер пулăшаканĕнче тăрăшнă. Вĕсем çемье бюджетне укçа хывнисĕр пуçне тонна çурă ытла тырă ĕçлесе илнĕ. Александр Яковлев вара, 8-мĕш класра çеç пулсан та, çăвĕпех тракторист пулăшаканĕнче ĕçленĕ. Йĕтем çине килнĕ тырра сорт-ласа кĕртнĕ çĕрте те шкул ачисем тăрăшуллă пулнă. Хаваслă линейка пĕрре-мĕшсемшĕн экзамен вырăннех пулчĕ. Вĕсем ăна тивĕçлĕ тытрĕç теме юрать, сăввисене уçăмлă, татса каларĕç, юрри те аванах пулса тухрĕ. Ку ачасем лайăх вĕренекенсем пуласса шанма пулать. Тата вĕсен камран тĕслĕх илмелли те пур. Акă, Я.Никифоров, В.Тумаланов, А.Александрова, В.Матвеева, С.Богатырев, М.Никифоров, К.Шикарева, М.Новикова, Д.Мальчикова, А.Кузьмина, В.Шуряшкина тата ыттисем вĕренỹре те лайăх ĕлкĕрсе пыраççĕ, обществăлла ĕçсенче те питĕ хастар. Янăравлă сасăллă пирвайхи шăнкăрав пурне те урока йыхăрчĕ. Пĕрремĕш урок хăрушсăрлăх темипе иртрĕ.