Чăваш Республикин Президенчĕн Н.Федоровăн садсемпе парксен çулталăкĕ çинчен калакан указне пурнăçласа пур çĕрте те- районсенче, хуласенче, ялсенче тавралăха илемлетес, симĕс тум тăхăнтарас енĕпе тĕрлĕрен конкурссем йĕркелеççĕ. Нумаях пулмасть пирĕн районта та ятарлă комисси çавăн пек конкурс кăтартăвĕсене пĕтĕм-летрĕ. Кунта комисси уйрăм ялсем, урамсем, тĕрлĕ предприятисемпе организацисем, учрежденисем, ялта пурăнакансен кил-çурчĕсем конкурс çĕнтерỹçисем пулнине çирĕплетрĕ. Акă, сăмахран, Шурутри пĕтĕмĕшле практика врачĕн уйрăмĕ (унчченхи участок больници) хăйсен территорине тирпей-илем кĕртессишĕн сахал мар вăй хунă, районти конкурсра пĕрремĕш вырăна тивĕçнĕ. Сывлăх сыхлавĕн учрежденийсем хăйсем те республикăри конкурс йĕркеленĕ. Шурутсем кунта та палăрнă- виççĕмĕш вырăн çĕнсе илнĕ. Пĕрремĕш вырăн- республикăри психиатри больницин. Шупашкарти 5-мĕш номерлĕ хула больници иккĕмĕш вырăн çĕнсе илнĕ. Маттур, шурутсем, тĕп хулари сывлăх сыхлавĕн учрежденийĕсемпе те тупăшма пултараççĕ. Тăрăшуллă та хастар, анлă тавракурăмлă медицина ĕçченĕсем тăрăшнипе районти сиплев учрежденийĕсенче вăй хуракансем хăйсен тивĕçне чыслăн пурнăçлама тăрăшаççĕ. Симĕс те чечеклĕ тавралăх хăй патне туртать-çке. 

Первоисточник: "Каçал Ен"